News

Saturday, November 25, 2006

مين طــفا الــنـور ؟ ؟


مــــــــين طــفـــــــا الــنـور ؟ ؟


السؤال ده كان على لسان كل اللى شاف استاد القاهرة مضلم امبارح قبل بداية الماتش بين
الزمالك مع حرس الحدود

كل شيء كان طبيعى .. لغاية قبل الماتش ما يبدأ بدقائق بسيطة .. انقطع نور احد الاعمدة ..
وهوباااااااااااااا كل الستاد ضلم يا معلم ...




واضطر الحكم يستنى 45 دقيقة عشان يلغى المباراة

واللاعيبة نزلت تعمل احماء علشان يستعدوا للمباراة .. لكن مشيوا واحد ورا التانى ..









وكلوا دلوقتى متلخبط .. هل يا ترى اتحاد الكرة هيعيد الماتش .. ولا هيحسب ان الحرس فائز 2-0




حسب القوانين .. صاحب الارض يتحمل مسئولية انقطاع التيار الكهربائى
وصاحب الارض هنا مين يا حلوين .... ههههههههههههه .... ده الزمالك .. والله الزمالك صعبان عليا
مش عارف يلاقيها منين ولا منين .. يعنى مهزوم من طوب الارض ومفيش فلوس .. وكمان النور يتقطع ... انا لو منهم اعمل فدو
ادبح عجل كده ولا حتى خروف .. اصل الحكاية دى اكيد فيها حاجة غلط .. بس مساكين هيجيبوا فلوس يدبحوا منين ... مع الاعتذار للزملكاوية ... واحد هيقولى " انت خليت فيها اعتذار " معلش بقي يا عم اصلها حاجة تضحك والله

و
فاروق عبد الوهاب سكرتير عام اتحاد الكرة قال إنه إذا كان القطع في الكهرباء داخل الملعب فقط ، فإن الزمالك سيعتبر مهزوما ، أما إذا كان قطع التيار عن المنطقة بأكملها ، فإن اللقاء سيعاد

وانا عن نفسي اتمنى ان اللقاء يتعاد ... ونشوف الزمالك وهو بيتظبط .. قصدى وهو بيلعب


والعاقبة عندكم فى المسرات ... وسلملى على عواميد النور

لقراءة التفاصيل .. filgoal




6 comments:

كازانوفا said...

والله العظيم حرام اللى بيحصل للزمالك ده يعنى المشرحة ناقصة قتلة يعنى استاد القاهرة ده تبع مين..؟؟

مش تبع ام الاتحاد المصرى يقوم الاتحاد المصرى يحسب الماتش للحرس يعنى اللاعيبة هيا اللى راحت فصلت الكهربا ؟؟

اه ازيك يا اسلام ويارب تكون بخير اول زيارة لمدونتك حرقت اعصابى ياباشا هههههههههههه

islamz said...

ههههههههههههه .. ليه كده بس يا عم كازانوفا .. ليه تحرق دمك .. لو كنت زملكاوى على حق استحمل .. وميهمكش بكرا تقفوا على رجليكوا تانى ...

انا زعلان على الزمالك والله العظيم .. بس اللى موقعه الناس اللى طمعانه فيه والناس اللى سرقوا فلوسه .. مش حرام بذمتك اللى حصل فى الزمالك ده .. من ساعة ما دخل مرتضى زفت منصور .. والزمالك راح عند ام تتح ...

فرحان جدا انك جيت المدونة .. واتمنى اشوفك على طوووووووووووووووول ..

ارق تحياتى لك يا كازانوفا التدوين ...

:]

Sampateek said...

نمى الي علمي ان المسؤول عن انقطاع التيار الكهربائي هو





فار اهلاوي





بس و الله عفارم عليك يا ابو الفرافير

طلع فار من ضهر فار


:)


يعني لو مكنش النور قطع كان الزملكوية حيعملوا اية؟؟!!! بلا وكسة
دة الفار انقذهم
----
كلبوزة لكن اهلاوية

islamz said...

هههههههه , ياااه دنا كده هحب الفيران .. وعندى فكرة كمان .. احنا نقدم خدمة لاصحابنا الزملكاوية ونمسكلهم الفار وديهولهم يدبحوه عشان النحس يتفك ... ههههه

ولعتيها يا كلبوزة .. والزملكاوية هيحدفونا بالطوب .. ههههه

لكن ولا يهمك ... الاهلاوية موجودين ..

ولو لم اكن اهلاويا لوددت ان اكون اهلاويا

نورتى البلوج يا كلبوزة .. ومتقاطعيناش بقى .. ابقي اسالى ...

تحيااااتى ...

smraa alnil said...

ههههههههههه
اهلييييييي اهلييي
اوه اوه
اهلي اهلي اوه اوه
بص شوف الاهلي بيعمل ايه
اهلي اهلي يا اما بلاش الزمالك دة مايسواش
ههههههههه
معلش بقي نسيت نفسي
اعزائي البلوجرين اود ان اعلن لكم من بلوجري هذا
ان البقاء لله
وربنا يرحمه
الفاتحة ليه يا جدعان
مين ؟؟؟؟
الزمالك طبعا
ولا عزاء للزمالكوية

علي فكرة عجبتني اوي مدونتك هتلقيني هنا كل شوية ناطالك
ربنا يوفقك

islamz said...

اهليييي اهلييييي .. اووه اووه :]
هههههه .. انا كمان نسيت نفسي بس اعمل ايه بقي .. اهلاوى يا ناس .. اهلاوى وافتخر ... >>>> بعمل اعلانات قماش
ههههههه
انتى نورتى البلوج وشرفتي .. وتشرفى فى اى وقت ... وخطوة عزييييزة جدا يا اهلاوية ... مع الاعتذار للبلوجاوية الزملكاوية
... منتظرك فى تعليقات اخرى ... واسمحيلى ازورك ... والسلام ختام ...