العب تنس بمضرب الدبان

ايه رايكم .. لو نلعب تنس بمضرب الدبان ( الذباب سابقا) .. سامع واحد بيشتم من بعيد
يا عم وفيها ايه بس .. مزعلاك الحكاية دى اوى .. طب بلاش تعالى انا وانت نلعب جولف بعصاية المقشة
وانا يا عم اللى هجيب العصيان .... ايييييي .. ايه يا عم انت بتضرب ليه بس .. مهى رياضة حلوة يا عم ..

مستغربين من اللى اتكتب ده .. طب ليه .. مهو فعلا حاجات اكتر من كده بتتعمل باسم الرياضة
واصعب من كده كمان ..
الاسبوع اللى فات كنت موجود فى بطولة الجامعات .. لالعاب القوى .. رحت اتفرج وقلت ده هيبقي يوم رياضي جامد
ويا ريتنى ما رحت ... ده كان يوم الهبل الجامعى


نبتدى منييييين ... !!! بسسسسس

نبتدى بالوثب الطويل .. حاجة كده انما ايه تفرح ..
اى واحد كان شايف فى نفسه انه بيعرف ينط الحبل .. بيبقي مقتنع انه عنده مهارة الوثب ..

وده هو الدليل ...

الشاب اللذيذ ده كان شايف انه يعرف ينط .. ودخل بالبنطلون الجينز ... واداها نطة تقولش بينط من فوق نار
وده اولهم جاه جزع فى رجله .. يلا يستاهل ...

والاخ الازرق فى اصفر ده معرفش كان بيعمل ايه بالظبط .. هو اساسا كان بيلعب كورة مع اصحابه
ولما لقى الحكاية سهلة كده واى د عاوز يخش بيخش .. قالك لما اجرب .. بس وقع حتة وقعة ..

وده بقي صاحب الاخ اللى فوق ده كانوا بيلعبوا مع بعض كورة ..ودخل عشان يتحداه .. ووقع على ضهره فى الرمل ..
مناظر مسخره والله كنت عمال اضحك ضحك ...

المشكله ان اللجنة اللى كانت مسؤولة عن البطولة معترضتش على اى حد منهم .. رغم انهم عارفين ان الناس دى مش بيلعبوا فى اى نادى
ولا حتى مركز شباب الحبانية ..

بس يعنى هى جت على اللجنة اساسا اللجنة دى اراهن اذا كان حد فيهم عارف قوانين اللعبة ..

ده بقي البيه البواب .. قصدى البيه المراقب .. المفروض هو المسؤول عن قياس المسافات
وكان ماسك حاجة عاملة زى مازورة الترزى كده وبيحطها فى اى حته وخلاص والبرنس التانى يقول المسافة كده بالبركة

وعشان اللى مش مصدق ادى فيديو انا مصوره لطريقة اللى كانوا بيقيسوا بيها المسافة ...

الفيديو اللى فات ده للأخ التانى اللى المفروض بيقول المسافة
والله حاجة تموت من الضحك .. خمسة خمسين ... تقولش بيقيس قماش

مش عارفين ده ايه ؟؟ هههه ده المفروض الخط اللى بينطوا من عليه .. حبة طباشير على الارض

ودى صورة المراقب اللى بيقيس المسافة ... شايفين المسمار اللى حاطة مع المتر ده عشان يعرف يقيس .. ههههه


نييجى بقي للجري .. بطولة جرى 200 متر تتابع للبنات ...
وطبعا مفيش ولا بنت منهم كانت بتفهم فى اللعبة
وكانت بقية المسلسل الكوميدى لبطولة الجامعة

دى واحدة من المشاركات .. بنطلون جينز .. وبتجرى كأن فى كلب بيجرى وراها ..

ودى بقي لجنة الحكام ... كانوا قاعدين محسسنى انهم فى رحلة .. ولا على بالهم اى حاجة ..
وواحد منهم باصصلى وفاكرنى فرحان بيه وانا بصوره .. او انه نجم سينما


شفتوا بقى ان لعب التنس بمضرب الدبان اهون

هى دى الرياضة فى الجامعات .. ولا تنظيم ولا اهتمام .. ولا متابعة
وعاوزين نبقي فى صفوف الدول الرياضية
هههأأأو ... وهى دى العينة .. وما خفى كان اعظم ...


وسلملى على صفر المونديال ... هههههههه .. ولا نسيتوا
وعلى بطلة مصر نهلة رمضان اللى مقدرتش تشيل الحديد فى اثينا
وعلى كرم جابر .. اللى بعد بطولة اثينا مسمعناش عنه حاجة تانية



كل ده اساسه حاجة واحدة .. الاهمال والاستهتار ... ولا ايه




قال بطولة جامعات قال .. يا عم انا هروح العب بلياردو بالايريال بتاع التليفزيون