News

Thursday, December 14, 2006

حــاطــطــــ ... وشــــــ ...







حاطط وش وراسم ضحكة طب معلش
تضحك بعد مشفت الويل اما صحيح بقي حتة وش

راسم بسمة وجواك قسوة اما الوش ساعات بيغش

باصص فوق وعينيك مقفولة طب ليه باصص

كل ده برده وحاطط وش وراسم ضحكة طب معلش


**
حاطط ايدك جنب البسمة خايف بقك ميطوعكش
طب وازاى اما صحيح بقي حتة وش

ايدك ثابتة ده شيء متشاف مش عاوزين لمبة وكشاف

لكن وشك تحت الوش اتشاف .. يبقي اكيد وشك شفاف

كل ده برده وحاطط وش وراسم ضحكة طب معلش


**
ابيض واسود هى حياتك
ابيض لما تكون مستورة واسود لما تكون مقهورة

هى حياتك مفيهاش غش ولا الوش ساعات بيغش

كل ده برده وحاطط وش وراسم ضحكة طب معلش


**
صورة بمسمار فى حيطان عقلك
واجعك مسمارها عاجباك الصورة

هتستحمل وجعها ولا تشيلها بلاها غباوة

شيل الصورة وشيل الوش اصل الوش معاك هيكش

وترجع تانى من غير وش

وبعد ده كله حاطط الوش وراسم الضحكة... طب معلش


*****
اللى مفهمش ميشتمش كل واحد وليه هلوسته :]
ودى هلوستى انا

6 comments:

Amr Ahmed said...

قفشتك يا لومة

اول واحد اعمل كوممينت عندك

ايه الاخبار

واخبار المذاكرة

بس ايه ياعم الحلاوة دي


الشعر حلو ومعبر جدا

وفعلا المشكلة في الوشوش والاقنعة

يللا هانعمل ايه

هي الحياة كده

islamz said...

عموووووور .. يلا اختار لك جايزة تاخدها عشان انت الاول بقي ... ههههههههه

انا كويس الحمد لله .. والمذاكرة ربنا يستر بقي ..

فعلا المشكلة فى الوشوش والاقنعة بس دي بقت قديمة خلاص .. الجديد بقي اللى بيكون بيضحك على نفسه وشايف نفسه غير نفسه ..

حد فاهم حاجة .. :]

نورت يا عمووور

والسلام ختااام ... :]

smraa alnil said...

اسلام باشا
طبعا فهمت
بس عارف لما تختلط بالحياة اكتر واكتر هتلاقي ان حاتك كلها غصب عنك وشئت ام ابيت
كلها وشوش
هتلبس الف وش و وش
في الساعه الواحدة مش في اليوم
يعني مبرين نلبس وشوش
بس الخوف ان من كتر لبسنا للوشوش ننسي اننا لينا وش ونسيبه في وشنا من غير ما نشيل الوش عشان الناس تشوف الوش اللي مش وش
فاهم انت حاجة بقي
:>

masry said...

الله عليك يا اسلام .. لابجد حلو اوى
انت عبرت عن مشكلة حقيقية
مشكلة الوشوش هل احنا بنعاما بعض بوشوشنا الحقيقية ولا من وراء قناع زائف وهل احنا صادقين مع نفسنا ولا برده بنكدب على نفسنا
جميل جدا ، الى الامام واسمحلى ابقي ازورك تانى

islamz said...

سموووورة
متاكد من انك فهمتى واكيد عارف ان الحياة كلها وشوش كووولنا بنلبس وشوش سواء مضطرين او بمزاجنا
المهم ان كل واحد ليه الف وش

كان فيه اغنية للملك محمد منير بيقول فيها
( اصل الجراد أشكال والوان حاطط علي الأخضر بيحش له ألف ماركة وألف دراع وكل يوم بيبدل وش )

فاهمة بقي قصدى ولا ايييه ... :]

نورتى يا سموورة

islamz said...

اهلا يا مصري

سؤالك حلو .. هل احنا بنتعامل مع بعض بوشنا الحقيقي ولا بالوش اللى كل واحد عاوز يشوف التانى بيه
ومع نفسنا هل احنا صادقين ولا لا .. اعتقد بقي ان الحكاية دى نسبية
يعنى بتختلف من واحد للتانى

نورت يا مصرى .. وتشرف في اى وقت

تحيااتى :]