News

Monday, July 30, 2007

سـت عجـوزة !!



واقف انا وتلاتة صحابى الساعة 12 الظهر تقريبا .. واقفين جمب الرصيف فى الشارع
والدنيا حر .. واقفين نكلم مع بعض .. وفجأة ...

على فكرة بأه انتوا سدين الشارع وأنا مش عارفة اعدى
سمعنا الجملة اللى فاتت دى من ست عجوزة مكناش واخدين بالنا منها ..
المهم اننا واقفين جمب الرصيف ولا سدين الشارع ولا حاجة ...
رحنا ماشين من قدامها وقلنالها اسفين .. ست كبيرة وتمشي زى ما هى عاوزة بقي
... اللى حصل بعد كده بجد كان حلو أوى ... قالتلنا انا بهزر معاكوا
انا شفت شباب واقفين مكشرين قلت اضحكوا .. انا خلاص سامحتكوا ومش هبلغ عنكوا انكوا سديتوا الطريق
وضحكت .. وشها بشوش من وشوش الناس القديمة دى اللى ربنا راضي عنها ..
قالتلنا . عارفين انتوا حاسبتوا على طول ليه لما قلتلكوا انكم سديتوا الطريق
قلنلها ليه .. قالت عشان انتوا من الشعب المصري الطيب عارفين ان الشعب المصري ده اطيب قلب
فى الدنيا كلها .. قلنالها ربنا يخليكى .. قالتلنا انا بكلم بجد .. الشعب المصري ده مفيش زيه
طيب وحنين .. والكلام على لسانها .. بتقولنا انا سافرت بره .. سافرت السعودية وسافرت فلسطين
السعودية ربنا يكرمهم بس فيهم ناس قلبهم مش صافي للناس .. والفلسطينين عارفين ليه مش عارفين ياخدوا حقهم
قلنالها ليه يا حجة .. قالتلنا عشان قلبهم مش على بعض صدقونى لو قلبهم على بعض وشالوا الغل اللى على بعض من جواهم ربنا هينصرهم بجد هما اللى بيعملوا كده فى نفسهم .. لكن مصر قلبها طيب وشعبها طيب اوى ..
انتوا زى ولادى .. اوعوا حد يقولوكوا اشربوا سجاير وتشربوا .. قلنالها لا يا حجة الحمد لله محدش فينا بيشرب
قالتلنا اسمعوا كلامى بس خدوا بالكوا من بعض واوعوا حد يغريكوا بحاجة وحشة ..
انا خلاص سامحتكوا .. وتضحك ... وتقولنا عارفين ليه سامحتكوا .. قلنالها ليه
قالتلنا علشان الشعب المصري اطيب شعب .. وشاورتلنا ومشيت ..

الحوار ده كله مخدش اكتر من خمس دقائق .. بس اثر فينا .. الست العجوزة وقفت فى الحر ده لما شافتنا
مكشرين .. بس نسيت اسألها هو الشعب المصري اطيب شعب دى ميزة ولا عيب ..

*****

12 comments:

-_- said...

اللي يعيش ياما يشوف

Anonymous said...

موقف جميل شكرا علي المشاركه

smraa alnil said...

انا بقيت احس انه بقي عيب يا سمسم

بس اوعي يا واد تكون بتشرب سجاير بجد

واحشني يا واد
وبطل تسد الطريق بقي
اديك رجعت اهو و ومش ليك حجة

Sha2loob said...

أولاً بهنيك على أسلوبك البسيط خصوصاً دي أول زيارة.
دي مش اهانة.
أنا شخصياً بشوف ان أحسن اسلوب هو ابسط اسلوب ده رأيي وأنا حر فيه
ثانياً معرفش ليه بحس ان الناس الكبار عندها أمل وثقة فينا وفي البلد أكتر مننا احنا الشباب الصغير.
حد يعرف ليه
تحياتي

islamz said...

sharm :
------
واللي يعيش اكتر يشوف اكتر ..

نورت .. :]

islamz said...

انونيموس :
---------

متشكر ولو انى معرفكش لكن نورت برده
:] تحياتى

islamz said...

سمووووووووورة :
-------------
اخيرا شفتك هنا تانى ... ده النهاردة عيد يا سمووورة :]

تفتكرى الطيبة بقت عيب يا انجى .. ان الناس قلبها طيب بقي عيب ..
تفتكرى هي طيبة اصلا ولا استسلام
ولا التنين دخلوا على بعض ..

سجاير مييين بس .. حرام عليكى دي ريحتها بتعفرتنى .. غير الحشيش متلقيش .. هههه بهزر طبعا .. الحمد لله مليش فى البلاوي دى ..

نورتى يا سموووووووووورة .. ولو كنت عارف انك جاية كنت فرشتلك البلوج
مواضيع .. ليكى وحشة يا دكتورة سموووورة :]

islamz said...

شقلووووب :
--------

يا سيدي ومين قالك انى بعتبرها اهانة ..
انا عن نفسي مقتنع بأن البساطة اسهل الطرق عشان اوصل اللى عاوز اقوله .

فعلا انا معاك ان فى ناس كبار رايها ان الاجيال اللى جاية هيبقي فى تغيير على ايديها ..

وفى ناس كبار شايفة برده ان الاجيال اللى جاية هى بداية فناء الكون
وانتهاء البشرية ..

كل واحد ونضارتة اللى نضارته سوده وعاوز يشوف الدنيا كئيبة هيلعن ابو الشباب واليوم اللى اتولدوا فيه

واللى نضارته بيضه وشايف الحياة حلوة
ونفسيته مرتاحة هيشجع اللى حوليه ويحفز الشباب ويديهم الامل فى بكرة

ولا ايه رأيك ..
نورت واتمنى اشوفك على طوول :]

EGYPT EYES said...

الست دي أكيد لسه جايه من بره
يعني أكيد اكيد مش بتعيش في مصر

islamz said...

egypt eyes :
------------
لا والله من البلد دى وهى فرحانة انها من البلد دى .. عشان لسه شايفه ان فى البلد دى امل .. تصدق ... :]

Anonymous said...

كما قال الأخ ( شقلوب)
لقد أوصلت القصة و الحكمة من وراءها
بطريقة بسيطة تنفذ الى القلب مباشرة
لدرجة جعلتني أظن أنها حدثت معي البارحة .. و أثـّرت بي أنا أيضا
أثق أن هؤلاء الكبار في السن أكثر صفاء و نقاء منا بكثير
في داخلهم خير كبير ..
نحن جيل متعـب ..ترى الواحد منا لم يتجاوز الثلاثين لكنه هرم من الهموم و المشاكل و التعب ويصعب عليه أحيانا بدء حديث حتى مع أقرب أصدقاءه .. فكيف مع غريب
ـ أحسدهم أحيانا لأنهم عاشوا الحياة كما استحـقـّوها أما نحن .. نعيشها كما فرضتها علينا أبسط الظروف

islamz said...

جو ..
-----

صدقنى هى كمان كلامها كان بسيط جدا
بس وراه معانى كتير قوى .. لدرجة انى بقيت مركز اوى فى كلامها وعمال اجمع واقول يا ترى هى بتكلم على طبيعتها ولا زهقانة وكلامها ده فى اسقاطات على مواضيع معينة

لكن رجعت وقلت لنفسي اسقاطات مين يا عم انت دى ست بتكلم بالعافية ربنا ييها الصحة طبعا .. اسقاطات ايه اللى هتفكر فيها .. ده الكلام اللى طالع من جواها بجد كله صدق وكانت محتاجة تقوله لحد ..

وفعلا فى فرق شاسع بين جيلنا وجيلهم والمقارنة تظلمنا فايامهم كانت الحياة رخيصة كما يقولون .. لكن ايامنا اللى يفكر فى الفلوس يولع من السيرة بس

ربنا يديهم الصحة ويكرمنا .. ويقدرنا على اللى جاى

نورتنى يا جو .. وبجد اتمنى انك تكرر الزيارة ..

تحياتى لك :]