News

Monday, April 20, 2009

هو فين؟




هل فعلا الدنيا ربيع والجو بديع .. هل فعلا هنقفل على كل المواضيع؟

سؤال مهم طرحه على سواق تاكسي .. قاللى يا باشا - اشاسا نبقاش - فيه ربيع
هو الراجل بيكلم كده
قلتله ليه بقي ياعم الحج .. قللى يا بيه ربيع ايه دحنا الشتا السنه دى حسينا بيه بالعافية
الصيف كوش على السنة كلها .. قلتله ازاى يعنى قاللى هو حضرتك مسمعتش عن
- الانحباس الحرارى - وتقريبا يقصد الاحتباس الحرارى
قلتله لا سمعت بس انت ايه اللى مضايقك فيه

قاللى يا بيه الانحباس الحرارى غرق الدنيا وخلى الصيف كفته تطب عن باقي فصول السنة الاربعة
يعنى حضرتك بتحس طول السنة بالشتا والصيف بس لا في ربيع ولا خريف
والسنه دى اهو مكنش فى شتا كمان .
قلتله طب وده من ايه فى رايك .. قاللى من العربيات واللى بتطلعه من شكمانتها
هباب بعيد عنك والسواق من دول مش يخللى عند امه دم ويصلح عربيته لا ماشي مصدرلنا الكريمة
ومدياها فى وشنا لما اتعمينا

ولا المصانع واللى بتطلعه واللى بترميه فى البحر .. اومال ايه يا بيه ياما المسئولين قالوا
لاصحاب المصانع دوال ركبوا فناتر .. ركبوا فناتر ( يقصد فلاتر ) ومفيش فايدة
تقولش بترقص لناس عمى ..
ونيجي لليوم المنيل ده وريحة تقلب البطن من على بعد مية كيلو .. يا باشا ده مش فسيخ ولا رنجة ولا حاجة طبيعية وكتاب الله
محنا طول عمرنا بناكل الحاجات دى عمرها مكانت ريحتها بالشكل ده
دى مش معقوله ابدا

لكن ولا بقي جو بديع ولا نيلة .. ومواضيع ايه اللى تتقفل
دى كانت ناس رايقة زمان دلوقتى يا بيه بين كل موضوع وموضوع حكاية تعكنن
طلب يعكرلك دماغك .. مبقاش فى تقفيل مواضيع كله بيفتح لكله على الفاضى والمليان

نفسي يا باشا اشوف الست واقولها بديع ايه وربيع ايه
فانا بقوله ست مين اللى تشوفها ..
فبيقوللى الست سعاد حسنى
قلتله .. نزلنى على جنب انا نازل هنا
يا باشا لسة .. يا عم انا عاوز انزل هنا انا حر

قال الست سعاد قال ...

كل سنة وانتوا طيبين


*****

14 comments:

Unknown said...

طب ما هو عنده حق وكمان مثقف وعند فكر مش عندنا

انت نزلت ليه كنت كملت معاه اكيد كنت هتنقل حاجات أحسن

يالا زي بعضه

سقراط said...

صحيح انا مش عارف ايه اللى مزعلك
ايه يعني لما سواق التاكسي مايعرفش ان سعاد حسني مسافرة برة ومش فى مصر
انت حنبلي قوي على فكرة
ههههههههههه
انا اول مرة ازور مدونتك
وعجبتني قوي التدوينة دى
هازورك تانى ان شاء الله
تقبل تحياتي

islamz said...

احمد
----

هو عشان يبقي مثقف يقرفنى انا بقي
دنا جبت اخري منه .. قال ايه الست سعاد .. منا لو كنت كملت كنت هغلط فيه
فقلت انزل احسن

يلا كل سنة وانت طيب

islamz said...

سقراط
-----

يا سقراط باشا كان نفسي تبقي فى الموقف اللى انا فيه ده .. ده سواق مستفز
عامل مثقف وهو عليه مصطلحات تفرس اساسا
وقال ايه فى الاخر يقولى اشوف الست سعاد ... بصراحة قلت انزل بدل ما يحصل حاجة مش لطيفة ....

تحياتى وتنور فى اى وقت :]

عروس البحر said...

على فكرة بقى ده مثال للسواق المصري ، رغاي ، فتاي ، مسلي و دمه خفيف
النموذج ده مش هتلاقيه في أي دولة تاني على فكرة ، حاجة شبه الكشري كده :)
مدونتك جميله جداً

islamz said...

عروس البحر
----------

شبه الكشري .. ده كشري بايظ ..
دنا هجنن .. قال الست سعاد قال

تحياتى :)

micheal said...

هههههههههههههههه..والله في سواقين تاكسي دماااااااغ
:)
بس عامة ربيع إيه وبديع ايه فعلا..أحنا احنست ناس نلوث البيئة في اليوم ده
تحياتي

Hanadi Traifeh said...

واضح أن السواق استفزك كتير وخلاك تعصب. بالنسبة الي أنا, انبسطتت بقراية القصة وضحكتني كتير كتير . فشكرا للمشاركة!!

وشكرا كمان على زيارتك وتعليقك, شرفتني والله
:-)

islamz said...

مايكل
-----

كل سنة وانت طيب يا معلم
لوث براحتك :]

تحياتى

islamz said...

هنادى
-----

بالنسبة لى انا اتخنقت من السواق ده
بجد مستفز .. بس كل ما افتكره اضحك

منورة المكان .. وتشرفى بأى وقت

القمر الساهر said...

انت واخد موقف من السواق ليه

زعلان يعنى انه مثقف شوية

ورغاي شويتين

وبيتفلسف 3 شويات

اهو بيسلي طريقك زى ربع كيلو لب سوبر


بس على فكرة الراجل عنده حق الدنيا بقت زحمة وتخنق

طول بالك على الراجل ما تبقاش انت والاحتباس الحراري عليه

No Fear said...

السلام عليكم
كل سنة و أنت طيب

islamz said...

القمر الساهر
------------
ربع كيلو لب بس
ده كان مقلة متحركة

تحياتى :]

islamz said...

no fear
-------
وانت طيب يا معلم

تحياتى :]