News

Tuesday, February 09, 2010

بغض النظر صباح الفل


صباح الفل
صباح الفل بغض النظر عن اى شيء ..
بغض النظر عن الايام كلها بقت شبه بعض لدرجة تخنق

بغض النظر عن انى اشعر بهجوم اللون الاحمر على الدنيا اليومين دول
(فالانتين بقي )

بغض النظر عن هزيمة الاهلى اللى عكننت عليا

بغض النظر عن ان الشتا قرب يخلص وان ده فى حد ذاته بيسببلى ازمة نفسية

بغض النظر عن انى بقيت اليومين دول حلزونى متقوقز وبتنرفز من دبان وشى او دبان وش اى بنى ادم حواليا
على حد سواء

بغض النظر عن انى اللى بقي بيريح عينى هو لون الكتر الاصفر


تقريبا كده داخل على اكتئاب المجرمين .. شكل الكتر الاصفر بيريحنى جدا تخيلوا
والله العظيم حاطط الكتر قدامى طول الوقت

بغض النظر عن انى بقيت شايف الناس كلها اغبية فى السواقة الا انا ..
وباخد حقى فوري من اى حد مجرد انى احس انه بيرخم عليا

مجرد احساس بيبقي نهاره اسود .. وبيبقى شعاري

من النهارده مفيش سواقين انننا السواقييين
من النهارده مفييييش عربيات اااانننا العربيييااات
الله يصبحك بالخير يا سقا يا معلم ...

بغض النظر عن ده كله كفاية صوت اللى عارفة نفسها وهى بتكلمنى الصبح والاقى الفيبريشن فى ودانى
قوم بقي صباح الخير كل ده نووم
كل ده نوم ايه يا مفترية دى الساعة ستة ونص الصبح

بس اكيد فى امل ان اى حاجة حلوة تحصل .. صح ؟؟؟
بغض النظرتحصل ولا متحصلش برده صباح الفل

******

12 comments:

صيدلانيه طالعه نازله said...

طب يا عم مدام الفيبريشن فى ودانك يبقى المفروض تنط من السرير مش ترد الرد ده


حد طايل يلاقى اللى عارفه نفسها بتكلمه الصبح و تصحيه

وش بيغمز

عالم مفتريه صحيح

Unknown said...

صباح الفل

islamz said...

دكتورة علا :)
------------

بقينا احنا العالم المفترية .. ماشي .. ربنا يسامحك ياللى فى بالى ...

نورتى :)

islamz said...

دكتورة انجى
----------

هو انا فاتح مستشفى بقي .. ايه الدكاترة الكتير دول ...
منورة طبعا يا انجى .. وصباح الفل
:)

عايش... ولكن !!!! said...

بغض النظر عن انى قررت اعلق هنا
صباح الفل
:)

Unknown said...

حضرتك ولا تزعل نفساويتك خاااااااااالص انا افهمك الموضوع

اقعد بس كدا واستهدى بالله وبلاش تبص للكاتر الاصفر اوى كدة

احنا كلنا خدامينك يعنى طول ما الكاتر فى ايدك اول ما تسيبه قابل بقى يا معلم

انا مش دكتورة اصلا دكتورة دى على اعتبار ما سيكون انا لسة حيالله تمهيدى ماجيستير

صباحك فل

Unknown said...

صباح النور ومين سمعك يا سيدي

اقصوصه said...

ذكرتني بنك نيمي

اللي كنت كاتبته في المسنجر من مده

حلو حلو..غصبن عن الدنيا حلو

بغض النظر عن ان الحياه

تحب تنغص علينا عيشتنا

الا ان احنا بنعيش وبنتفائل بعد :)

islamz said...

عايش
====
صباح النور :)

islamz said...

انجى
----
يا انجى سيبينى لو سمحتى مع الكتر الاصفر فى قعدة الصفا دى اللى بينى وبينه ... وانتى ان شاء الله تبقي دكتورة

islamz said...

احمد
----
منور يابو حميد .. :)

islamz said...

اقصوصة
------
حنعيش زى الفل غصبن عن عين الحياة
:)
دمتى بود