News

Monday, January 29, 2007

التــاج عليــنا حــق


التاج التاج التااااج .. اوصفلك يا حبيبي التاج .. قبل ما اقولك قولى التاج يا حبيبي ...
(مع الاعتذار لام كلثوم على هذا الصوت الاجش ) ههههههه
التاج وصل يا جدعاااان .. ومن مين بقي من حبيب قلبى عموووور .. " اريدك انثى " ربنا يخليك ياعموور دبستنى يا عم الحاج .. ماشي ... انا رايح اجاوب بقي ...




اية اللي حيحصل لايميلك لما تموت ؟

اكيد كل الناس اللى اتسألوا قالوا ان السؤال ده رخم اوى .. وانا من مزنقى هذا بضم
صوتى لصوت اشقائي اللى اتسألوا وبقول السؤال ده رزل
عشان ابقي مختلف برده .. يا سيدي لما اموت اكيد الايميل هيقفل
بس باختلاف الشركات يعنى مثلا ..
الهوت ميل .. هيقفل بعد شهر من تاريخ الوفاة
الياهو .. بعد شهرين ونص من تاريخ الوفاة
جوجل العزيز .. مش عارف هيقفل امتى
والله اعلم .. :]


اديت الباس وورد لحد قبل كده؟

لأ طبعا وادي الباس وورد لحد ليه يعنى عبيط مثلا .. ولا مبعرفش افتح الميل بتاعى .. عجايب .. انت غريب يا هانى


لو اه كانت طبيعة علاقتك بيه اية؟



مقلنا لأه هى صورة ولا صورة .. ولا تكونش صورة


اســــــمك؟

اســــــــلام


اسم الدلع المشهور وسط اصحابك؟

ممممم .. لومة .. سلامونتى
:]

عمرك؟
20 سنة واربع شهور


برجك؟

برج القاهرة ... (حبة رخامة على الماشي ) ههههه برج الميزان .. واكيد طبعا زى ما الكل عارف ان برج الميزان هو برج العباقرة والمشاهير والمبتكرين وكل الناس الكويسة زيي كده يعنى ..(منتهى التواضع ) هههههه


مجال دراستك؟

كلية التجارة - محاسبة - جامعة قناة السويس


شخصيتك نوعها ايه؟

نوكيا 3310 فنلندى .. ايه نوعها ايه دى؟؟ اسمها شخصيتك عاملة ايه ؟ هههه .. اقولك كويسة بتسلم عليك بس ايدها مش فاضية مش عارف صيغة السؤال الصح مش مجمع دلوقتى المهم انا هجاوب وخلاص .. بص يا عم انا طيب زى اصحابي مبيقولوا بس بتعصب بسرعة .. عشان مبحبش الاستهبال يعنى محبش حد يستعبطنى .. وعلى راى الكابتن عادل الفار " انا بشتغل نفسي محدش يشتغلنى " ههههههه بحب الهزار والضحك .. بس لو حد هزر فى وقت انا مركز او شغال بجد عينك متشوف الا النور .. اسيب اللى في ايدي واهزر معاه ههههههههههههههههههههه لا بجد انا بحب الهزار صحيح .. لكن ليه وقته يعنى ..


السفر بالنسبة لك؟

يا سلااااااام .. السفر يا عينى على السفر السفر ده متعة المتتاتيــع كلها والمتتاتيــع جمع متــعة .. شششش .. انت جاهل انت اشفهمك فى العربي وبجد احلى مكان سافرت له هو السعودية لما كنت بعمل عمرة كانت احلى ايام وخاصة انى رحت فى رمضان .. ربنا يكتبها للكل ..


المود بتاعك؟

30 فى الشتا .. و28 فى الصيف .. وابقي بص على الكاوتشات كل يوم ولو حصل حاجة تحت امرك يا عم انت ايه الاسئلة الغريبة دى .. مش بقولك انت غريب يا هانى بص يا سيدى انا مودى حسب الموقف .. يعنى لو الحياة ماشية ومفيش حاجة تعكنن عليا ببقي زى الفل واخر روقان لو فى اى بنى ادم رخم عكنن عليا او اى حاجة حصلت معجبتنيش بقلب على طوول .. بس عامة انا بحب التفاؤل والابتسامة دائما اهم حاجة عندى
وقت فراغك بتعمل فيه ايه؟


معظمه بيبقي للنت والكمبيوتر عامة .. لكن بحب اروح النادى والجيم واخرج مع اصحابي واروح سينما وحفلات وكل حاجة ممكن تتعمل تلاقينى بعملها الحاجات الكويسة بس طبعا .. عشان انا عارفك نيتك وحشة ونفسيتك مش صافية وممكن تفهمنى غلط وتشوه صورتى فى بلد البلوجرية

الاكلة المفضلة؟

ممممممم ... يوووه كتييير بس احلى حاجة ممكن البيتزا .. لأ لأ الجمبري لأ لأ لأ السمك المشوى مع رز .. وطحينة يوووه .. او الكشري حبيب قلبي وحاجات كتير اوى ..


الصفات اللي خدتها من بابا؟

خفة الدم .. الثقة بالنفس .. العند والدماغ الناشفة احترام نفسي واحترام الناس الايمان بالله والخوف من ربنا فى افعالى


الصفات اللي خدتها من ماما؟

ياااااه ماما دى حبيبتى .. خدت منها برده كل حاجة حلوة الصراحة ، الحنية ، طاعة ربنا وحاجات كتير اوى .. كفاية انى ابنها


اكتر 6 حاجات بتكرهها؟

الغبااااء
النفاق
الاستهبال
وضع العرب بالنسبة للعالم
بوش القرد
سحس
ايام الامتحانات معلش بقي طلعوا سبعة ..


اكتر 6 حاجات بتحبها؟

بابا ، ماما ، اختى
اصحابي
الكمبيوتر
الأهلـــى

( Avril lavigne )
اخر حاجة ملكوش دعوة بيها بقى


الشغل بالنسة لك؟

تصدقوا بقي ان الشغل ده امنية حياتى حاسس انى هعمل حاجة جامدة فى شغلى من زمان وانا صغير حاسس انى لما هشتغل هبدع بقى فى الشغل واعمل اللى متعملش وربنا يسهل ..


ايه الكمبيوتر والانترنت بالنسبة لك؟

ياااااه .. ده احلى عالم .. وانا قاعد كده
اعمل كل اللى انا عاوز على النت .. كفاية البلوج ده مثلا
انا فرحت بيه اوى لما عملته وبدأ يتعرف
واتعرفت على ناس كتيرة منه
ومن النت عامة اتعرفت على ناس كتير
وفى منهم شفته على الحقيقة
وفى منهم على اتصال به لغاية دلوقتى
يعنى فى صديقة عزيزة عرفتها من على النت
اسمها نهى .. انسانة محترمة جدا .. اتقابلنا فى جروب على
النت واتفق الجروب مرة انه يحضر مؤتمر
فى جراند حياة .. وفعلا شفنا بعض لأول مرة كلنا
وكنت فرحان انى شفت انسانة عاقلة زى نهى
يعنى النت له فوائد كتير زى ما له مضار برده
والعاقل هو اللى يعرف يستفيد صح من وقته قدام الكمبيوتر
مش يبقي تنبل قاعد مبحلق فى الشاشة كده وخلاص
واخره يسمع اغانى ويتفرج على افلام ..
ولا اييييه ...

********


وهبعت التاج ده بالحمامة الزاجلة الماكرة
اللى فوق دى .. الى كل من

نادين
بيسوو
انسانة
كوبا
واحد من الناس
احمد شقير حكاوى اخر الليل
كارول

واى حد عاوز يجاوب يجاوب يا جدعان
الاسئلة سهلة خاااالس
والاجابات متوقعة وتم التدريب عليها
والسلام عليكم ورحمة الله وبركاته

كان معكم اسلام من جوار
الكيبورد والموبايل وعلبة الدوا عشان معاده دلوقتى

********


8 comments:

Unknown said...

يانهار ابيض
دي تالت مرة يجيلى التاج فيها
والله العظيم مجوباه يا نااااس من يوم الاربع اللى فات

تحت عنوان
ايه الرغى ده كله
http://2insana.blogspot.com/2007/01/blog-post_24.html

حوسة لاكون ميس اجيبت وانا مش واخدة

وبعدين ايه متعة المتاتيع دي؟
اينعم انا بألف كلمات انا كمان بس مش لدرجة المتاتيع هههههههههههه

حالتك بقت صعبة اوى .. اوعى تسكت على نفسك

islamz said...

انسانة .. يا ستى زيادة الخير تلاتة واربعة .. حد يكره .. وبعدين ميس ايجيبت ايه بس هنشتغل بعض .. ههههههههههههههههه
لا لا متزعليش ميس ايجيبت يا ستى ولا يهمك ..

وبعدين انت ايش فهمك فى اللغة العربية الفسحة .. متعة المتتاتيــع جمع مذكر سالم
او سليم لو سالم مشغول .. واى خدمة او درس عربة انا فى الخدمة ..

متعنا اكتر متعنا .. متعنا وبلاش تمنعنا .. متعنا اكتر خلى مش عارف ايه مهما على مش عارف ايه برده ..
والسلام عليكم ورحمة الله وبركاته ..


:]

إنسان || Human said...

دمك خفيف يامضروب.....ياترى لما أحب أكلمك أقولك خطوة ولا عزيزه ....أنا باهزر طبعا ..أنا مبسوط جدا لزيارتي الأولى لمدونتك الثريه وأتمنى التواصل.....بس مين هاني ده ..ولا مين السحس

Memo said...

انا متابعه البلوج بتاعك من فتره و حمدالله عسلامه بعد الامتحانات
تحياتشي

Amr Ahmed said...

شاطر يا واد يا اسلام

بتسمع الكلام

بس حلوة التدبيسة دي هه

سلام يا جميل

islamz said...

human :
--------

انا مضرووب ماشي ... انا والله الى مبسوط انك بتزورينى .. واتمنى انك تزورينى على طووول ... وبالنسبة للأخ هانى ده انا معرفش مين هانى ده وجبتش سيرة حد اسمه هانى .. وبالنسبة لسحس بقي فبذمتك فى حد ميعرفش سحس .. عيبببببب سحس حبيب الملاليم
حوستى مبارك .. ههههههههه

والسلام ختاااام ... :]

islamz said...

memo :
-------
ميموو والله بجد فرحان انى لقيتك متابعانى .. على فكرة بقي انا كمان متابعك .. ههههههه .. بأمارة العريس الالكترونى .. والوظيفة بالواسطة .. والمية وخمسين جنية اللى طلعوا الف وخمسمية جنيه هااااا اسيح ولا كفاية كده .. هههههههههه

.. الله يسلمك يا قمر والله الامتحانات دى عملتلى هسهس فى دماغي ... واتمنى تزورينى على طووووول ...

تحياتشى انا كماااان

:]

islamz said...

عمووووووووور :
---------------
بقي تدبسنى وتقولى شاطر مااااشي يا عم ..
انا جاوبت عشان خاطرك بس يا جميل ...

وابقي خش اون لاين يا عم انت بقي عاوز اتكلم معااااك

سلاااااااااامز :]