News

Thursday, March 22, 2007

عيد الأم يا عيد الأم



يا سلااام .. النهاردة عيد الام .. افتح التليفزيون الصبح الاقي برامج الاطفال
بتاعة المذيعة ام شعر اصفر بتاعة اتفالى الحلوين قولو لماما كووول سااانة ووووهيييييي تيييبة
مين منكم يا اسدكائي الحلوين يقوللى ليه هيقول لمامته كل سنة وهى تيبة انهارده بالذات
ويرد عليها طفل متأثر بجرعة التخلف .. علشاااان ماما اتولدت النهاردة
المذيعة عاوزة تضربة بالميكرفون فى وشه اصل برامج الاتفال قصى الاطفال على الهوا
تقوله اقعد يا حبيبي وتروح زغده الواد بعد ما الكاميرا تبعد عنه .. وتبتسم تانى وتقول مين يا حبايبي هيقولى السبب
بنوتة صغيرة ترفع ايدها اكنها عاوزة تروح الحمام وتقولها انا انا انا انا
المذيعة تنشكح وتقولها تعالى يا حبيبتشي اسمك ايه
البنت الصغيرة تقولها : اسمي ام رضا
المذيعة تقولها نعم اسمك ام رضا .. البنت عينها ترغرغ بالدموع وتقولها والله يا ابله ده اسمى
تقولها طب يا حبيبتشي متخافيش واسمك ايه بالكامل يا امورة
تقولها البنت : ام رضا تامر حسنى
المذيعة وقد فاض بها الكيل .. طيب يا حبيبتى مش مهم اسمك بالكامل
اسم ماما ايه علشان نقولها كل سنه وهى تيبة
ام رضا تقولها : ماما اسمها نورهان
المذيعة ترمى الميك من ايدها وتشد البنت من ضفايرها وتطيرها فى الهوا
وهى بتقول انتى يا بت انتى عاوزة تطلعينى هابلة
انتى حد مسلتك عليا من كناة منافسة ( قصدها قناة منافسة ) وكفاية عشان اعصابكو متبوظش

نرجع لمرجوعنا ونعيد على مهمهاتنا كلهم
وكل سنة وانتى طيبة يا ماما
ويا رب تكونى بألف خير وصحة وسعادة وتفضليلي طول العمر جانبي

وكل سنة وكل امهاتنا طيبين
وزى ما بيقولوا المذيعين فى التليفيزيون
اللى مزعل مامتشه فى حاجة يقوم بسووورعة يصالحها
ويقولها سامحينى يا مامتشي يا حبيبتشى .. وكل سنة وانتى طيبة

واللى بعيد عن مامته يقوم بسوووورعة برده يرفع سماعة التليفون او لو معاه كريديت فى الموبايل يقوم يكلمها
مش يرنلها وهى تكلم بلاش عفانة بقي
ويقولها كل سنة وانت طيبة يا ماما

ونصيحة لكل زوج متنساش تكلم حماتك علشان يبقي عندك امل تحضر عيد الام السنة اللى جاية وميبقاش
عيد الام هو نفس تاريخ ذكرى سنويتك

كل سنة وانتوا طيبين وانا بأه عاويزكوا تشوفوا الاغنيه دي
هى عن عيد الام برده
انا لقيتها على النت ومت على نفسي من الضحك وعملتها زى كليب كده عشان تبقي احلى شوية
يلا كل سنة وانتو طيبين


10 comments:

basma saghir said...

هههههههههههههههههههه
انا رنيت على ماما وهي الي كلمتني..بس انا والله كنت عايزة اتصل..بس هي كنسلت واتصلت هي
امي حبيبتشي عارفة ظروفي المادية

أُكتب بالرصاص said...

والله معاك حق

هاهاهها
برامج الاطفال الهبلة
بالاضافة ان عيد الام
معناه
لازم نكد

كل الافلام عن عيد الام نكدية

مافيش ام فرحانه؟
امينة رزق على فردوس محمد
على نجلاء فهمي في فيلم الجراج
كلهم طالع عين ابوهم؟

مافيش ام كويسة شقيانة بس فرحانة؟
اه يا غلبي

حائر في دنيا الله said...

أرخم حاجة في عيد الأم، محاولة اختصار العلاقة بيينا وبين امهاتنا في يوم واحد
وليس في كل أيام السنة
قد تكون الفكرة في حد ذاتها نبيلة ولكن اختصار المشاعر في رنة او مكالمة هو ما بوظ الموضوع كله
شخصيا لا يفرق معي هذا اليومن بقدر ما تفرق معي علاقتي بالست الوالدة كل لحظة

مع تحياتي

smraa alnil said...

هههههههههههههههههه
احلي حاجة في البوست دة الاغنية
معبرة جدا
انا ماما لما اتصلت بيا
اول ما سمعت صوتها قلتلها كل سنة وانتي طيبة طبعا هديتك وصلت
قالتلي ابدا يا بنتي انتي بعتي حاجة
قلتلها هو صوتي دة وكلامي معاكي مش كفاية
ههههههههههههه
طبعا ماما حبيبتي قعدت تمدح فيا واخدلي بالك انت
هههههههههههههه

المهم كل سنة ومامتك طيبة يارب
وربنا يخليهالك

islamz said...

بيسووو :
---------
ههههههههه .. حتى فى عيد الام يا شيخة حرام عليكى كنتى انتى كمان كنسلتى عليها وصممتى انك انتى اللى تتصلي وبعدين هى تكنسل وتصمم ان هى اللى تتصل عشان انتى بنتها حبيبتها وهكذا بقي لحد محد فيكوا يزهق ويقفل التليفون ... ههههههههههه

كل سنة ومامتك طيبة وكل الامهات طيبين ..
وربنا يخليلك مامتك وكريديت موبايلك

:]

islamz said...

اكتب بالرصاص :
------------
والله بفرح لما بلاقيك هنا :]

برامج الاطفال العربي عموما والمصري خصوصا من افشل انواع برامج التواصل مع الاطفال ..

ولا افلام عيد الام على رايك كلها نكد فى نكد مرة شادية تبيع يسرا وهى صغيرة عشان معهاش فلوس وعشان تربي بقية العيال وتروح تشتغل خدامة
ومرة ست الحبايب يا حنانانننت

وست الحبايب يا حبيبة .. كلها نكد وعياط .. والله حاجة تنكد على الام الفرحانة نفسها

المهم انت نورت ..
ولكل سنة وكل الامهات طيبين

islamz said...

حائر :
-----

عندك حق فى الحكاية دى
يفضلوا طول السنة ناسيين الستات وييجوا فى شهر مارس ويقولولك ده عيد المرأه
ويفضلوا طول السنة ناسيين الامهات وييجوا فى يوم واحد ويقولك قال ايه عيد الام
طبعا انا مش معترض على عيد الام بس اعتراضي على نفس الحكاية اللى انت معترض عليها وهى اختصار العلاقة بين الابناء والامهات فى يوم واحد وبس
وطول السنة موبايلات بقي ها .. على رأى هنيدى

المهم كل سنة ووالدتك طيبة وكل الامهات بالف صحة

تحياتى :]

islamz said...

سموووووووورة :
------------

هههههههه .. عجبتك الاغنية .. اه يا فاشلة شكلك من اللى بتعبر عنهم الاغنية زيي كده ههههههههههه
لا يختى وانا مالى انا جبت لمامتى هدية
( انى رجعت من السفر ) هههههههه

وكمان مامتك هى اللى اتصلت بيكى ليه هى اللى هتقولك كل سنة وانت طيبة ولا ايه

وانا عارف طبعا قعدت تمدح فيكى ازاى .. واخد بالى اوييي ههههههههه
بس خللى الطابق مستور .. انتى عارفانى مبحبش افضح حد .. ولا اتكلم بقي ..

ولا خلاص دى مش اخلاقي .. ههههه وانت ست العارفين ....

انتى كمان كل سنة ومامتك طيبة وربنا يخليلنا مهمهاتنا احنا الاتنين ..

وعقبال متجيبي عكروت صغير يطلع عينك طول السنة ويجى يوم عيج الام جايبلك ورده ويقولك كل ثنة وانتى تيبة يا ماما .. وبعد ربع ساعة كده تلاقيه جى يعيط عااااااااااااا مامااااااااا
عاوز 5 جنيه اشترى شيبسي
وانتى تقوليله يا حبيبي ( متأثرة بالوردة اللى جابهالك ) يا حبيبي منا لسه مديالك 5 جنيه الصبح .. الواد ابن الـ..... منا جبتلك بيهم ورد وخلصوا عاااااااااااا
عاوز شيبسييييي

انجى : ( تقلع الشبشب وتجرى ورا الواد فى الشقة خد يا ابن الـ.... انت بتشتغلنى يلا طب لما يجى ابوك

هههههههههههههههه

ربنا يكرمك يا انووووجة يا قمر

تحياتي ليكى ولمامتك :]

Amr Ahmed said...

حلوة ياعم اسلام

وكل سنة وكل الامهات طيبين

islamz said...

عمووووور ..
-------
مش عارف ليه حاسس انك مضايق من حاجة
يا رب تكون بخير يا عمرو
وكل سنة ومامتك طيبة
ونورت يا عموور :]