News

Saturday, August 11, 2007

صادق من غير حلفان !!!


واقف فى الشارع مهدود وقرفان من الحر .. ومستنى تاكسي يحن عليا ويقف
مهو التاكسيات بقت بمزاجات اصلها .. السواق لو عجبو المشوار هيركبك ولو معجبوش
هيشاورلك بإيده يعنى لا مليش مزاج .. حاجة تخنق ...

المهم مش ده موضوعنا .. انا عن نفسي مبحبش اركب تاكسي فى حد راكب عشان معطلش اللى راكب
ومعطلش نفسي انا كمان .. الا فى الحالات الميئوس منها يعنى اكون واقف بقالى نص ساعة مستنى تاكسي مثلا
.. والنهارده كان احد هذه الايام العصماء ..

وقفت تاكسي راكبه واحد بدقن كده وقاعد قدام

والسواق شاب كده بتاع 25 - 30 سنة بالكتير .. والراجل عمال يكلم مع السواق ويقوله
انا عملت كذا دنا لما كنت فى سنك كانت الحاجات رخيصة ومش عارف ايه .. وعمال يحكى حكايات
وكان فى فى التابلوه بتاع التاكسي ما يشبه المصحف .. كل ما الراجل ابو دقن يحس ان السواق مش مركز معاه

يروح حاطط ايده على المصحف اللى على التابلوه .. ويقوله " وحق المصحف ده " ده كان بيحصل كذا وكذا ومش عارف ايه
وشويه يرغى ويروح حاطط ايده على المصحف ويحلف " وحق المصحف ده " ده الناس زمان كانت بتعمل ايه وايه

والسواق يقوله بلاش حلفان يا حج .. صادق من غير حلفان .. ومفيش فايده
كل شوية الراجل يحلف ويحط ايده على المصحف .. والسواق يقوله من غير حلفان يا حج ..

وفين بعد بتاع 8 - 9 - 10 مرات السواق زهق .. عمال يقوله بلاش حلفان بلاش حلفان ..
راح موقف التاكسي وماسك ما كنت اعتقد انه مصحف
وقاله " بص يا حج ده انجيل مش مصحف وانا اسمي مينا عبد الملاك " وحرام عليك كل الحلفان
ده .. وعمال اقولك من غير حلفان من غير حلفان .. زهقتنى ..

الراجل كان مذهول وبقه مفتوح ونزل من العربية من غير ولا كلمة .. وانا كنت قاعد ورا هموت من الضحك
فعلا الموقف كان كوميدى ميتقلش عليه اكتر من كده ..

السواق طلع ازازة مية .. وشرب كده وهدا نفسه .. وقالى ينفع كده يا استاذ عمال يحلف يحلف ..
وانا اقوله بلاش حلفان بلاش حلفان .. اعمل ايه بس ..
ينفع كده .. ده نرفزنى ..

انا من غير وعى وانا بكتم ضحك قلتله لا " والمصحف ما ينفع " وطلعت منى من غير قصد
فضحكت فضحك هو كمان .. وقاللى اه لو نبطل حلفان .. ونصدق بعض من غير حلفان
" والعدرا كانت كل حاجة هتمشي زى الفل " وضحك ضحكة مجلجلة وقاللى شوف انا لسه بقولك ايه بس خلاص
دى بقت عادة فينا .. احنا شعب حلاليف ..
وضحكنا احنا الاتنين على الكلمة الاخيرة دى ...

صحيح احنا بقينا شعب حلالــيــ .... قصدى بيحب يحلف كتير ؟؟

انا عن نفسى .. وربنا مبحلف خالص !!!!!!!


*******

15 comments:

علا من غزة said...



ههههههههههه

اه بجد الموقف خرافي يموت من الضحك

الراجل اكيد يا عيني ازبهلّ وما توقعش النهاية تكون كدة

دي حتى تنفع نكتة :p

تعرف انا ماما زمان كانت تقولي ان الواحد لو حلف كدب على الصحف ربنا يعميله عينيه !! ولغاية اليوم بخاف جدا اني احلف باطل والحمد لله انها مش عادة

بس عندنا الحلفان الشائع .... عليا الطلاق بقى :p

لسه الحلفان على المصحف ارحم !! اسمه كلام ربنا


سلامات :)

. said...

ههههههههه هههههههههه
هأهأهاأأ
هههههههههههههه
يخرب عقلك يا اسلام
انجييييييل؟؟؟؟؟ عمال يحلف على انجيل؟؟؟؟؟
ههههههههههههه
يلهوي موقف زبالة
بجد منظر الراجل الرغاي الحلوو..قصدي الي بيحلف كتيير
بقة زي الزفت
انتا ازاى مسكت نفسك من الضحك؟
انا لو مكانك كان زماني اضربت

Anonymous said...

peace peace gamda bgd mooooooot t3rf en f3ln kol elnas b2t t7lf bsbb aw mn 3`er bs ent shklk msh elly kan 23d wr bythy2 le enk ent elly knt 2a3ed gnb elswa2 wbt7lf aywa aywa mtkdbsh hahahha wla t7lf eno msh ent

islamz said...

علااااا :
-------

نكتة واى نكتة .. بقولك كنت هموت من الضحك .. وعمال اكتم بالعافية ..

بس الحلفان بالطلاق ده صعب وتقيل اوى ..
على العموم ربنا يهدى الجميع ..

ومنورة يا علا :]

islamz said...

ذرة حزينة ..
---------

ولا بلاش ذرة حزينة لحسن انتى بتزعلى ..

انا مش عارف مضحكتش ازاى اصل الراجل كان صعبان عليا اوى وهو مذبهل من الموقف كده ومش عارف يعمل ايه ..

لا اضرب مييييين .. مش كل طير اللى يتاكل الكبد والقوانص بتوعه ..

ههههههه .. متخافيش مش هتضربي ولا حاجة .. ديتها هيقولك انزلى انتى كمان

:]

islamz said...

سارووو :
------

انا مش عارف بقي انتى اسمك سارة ولا انت واحد ولا ايه يا عم ولا يا عمة __ ده غير العمة نور طبعا __ عرفنا او عرفينى بنفسك :]

ميييين انا اللى كنت قاعد ادام ...
" والمصحف ابدا " انا مبحبش احلف :]

تحيااااااااتى :]

Sha2loob said...

اسلام باشا
عامل ايه؟
أضحك الله سنانك. بس الموقف ده نموذج صارخ للي بيحصل حوالينا كل يوم.
الراجل ببساطة مكانش سامع غير نفسه ومش شايف غير اللي عايز انه يشوفه ويا سيدي مش مشكلة أنا أعرف واحد مسيحي مبيحلفش غير بالمصحف. يكلمك في أي موضوع تسمع في كلامه ييجي 500 والمصحف فمدتقش
بمناسبة الحلفان أنا مكنتش بحلف لحد أما كان عندي 10 أو 11 سنة دلوقتي معرفش ليه مبقيتش عارف أتكلم بقيت بحلف بس.

حلوه جداُ. مش مصدقني؟ طب والله حلوه

سلام

islamz said...

شقلوووب :
--------

ههههههههههه .. والله مصدقك :]

والله نورت .. والمصحف لتبقي تيجى تانى ..

بس وحياة ابوك مش عاوزين حلفان بقي

أحمد المصري said...

نياهاهاهاهاها..الموقف يفطس من الضحك وكويس غن الراجلطلع طيب كده وظريف..
بس انت بتتكلم بحد والله؟
سلام0

islamz said...

احمد المصري
--------

ههههههههههههههههه
اه يا خبيث عاوزنى احلف عشان تقول شوفوا بيحلف اهو .. بس لا على مييين
وحياة ربنا مهحلف تانى ...

:]

حائر في دنيا الله said...

ربما عدم الثقة
لا تثق في نفسك فكيف سيثق هذا الذي لا يعرفك بك دون ان تستعين بشئ مقدس عندك او عنده ليساندك حتى يقتنع انك لا تكذب عليه
وايضا لكثرة انتشار الاكاذيب واختلاط الحق بالباطل نريد تثبيت ما نقول لأنه ربما يكون غير صحيح أيضاً

لك تحياتي وضحكاتي على هذا الموقف الجميل
:)

islamz said...

حائر ..
------

اولا حمد لله على سلامتك ورجوعك .. وفعلا كلامك صح كثرة انتشار الاكاذيب
بيخلى الناس تحلف كتير يمكن اكتر ما بتكلم

تحياتى لك وحمدلله على السلامة مرة تانية
:]

lonlysmily said...

مسخرة بجد الراجل وسواق التاكسى
بس لو الراجل فعلا كان صادق فى كلامه مكنش احتاج انه كل فسوة يحلف بالمصحف على الرغم ان الحلفان بالمصحف حرام
من حلف بغير الله فهو كافر
والحلفان بالمصحف ليه كفارة
يعنى الراجل حتى مش فاهم حاجه
جاتو الارف

Unknown said...

وغلاوتك ... مقالة زي العسل

Lasto-adri *Blue* said...

جامدة قوى