سنة اولى تدوين

سنة عدت بالظبط
سنة عدت على اول بوست كتبته هنا
هو فعليا اول بوست كتبته كان يوم 10/21 /2006 بس هو مكنش بوست يعنى
هو بس كان مجرد كسر لحاجز الكتابة والتدوين عامة
بينى وبين التدوينbreaking the ice زى ما بيقولوا كده
لكن اول مرة اكتب كان 2006/11/10
وكنت بجد متحمس جدا فاكر اول مرة حد يكتب عنى كان طارق فى مدونته كلمتين
رحب بيا وبالمدونة وكنت لحسن حظى العضو 100 فى قهوة المدونين المصريين
وكان ترحيب حلو من طارق زود حماسي للتدوين

*******

كان كل يوم تعلقى بالتدوين بيزيد حاسس ان اسلوبي اختلف عن بداية ما ابتديت بالتدوين
مش هقول اكثر حرفية لكن بقيت فاهم يعنى ايه تدوين تقريبا
ومع زيادة تعلقى بالتدوين زادت معرفتى بالمدونين واصبح كتير منهم اصحابي
بسأل عليهم وبيسألوا عليا .. بيقرولى وبقرا لهم
كل مدونة فيها شيء بيميزها وده حاجة انا مقتنع بيها جدا والا مكنش هيبقي فى العدد الكبير
ده من المدونين والمدونات .. وزيي زي اى مدون بيفرح لما يحس ان فيه قراء له
وبيتابعوه بيديله حافز كبير .. منكرش انى بفرح لما حد بيقولى ان البوست ده عجبه
او انى اضايق لما حد بيفهم كلامى غلط او اغضب لما حد يتلفظ بالفاظ لا اقبلها على مدونتى
فرحت اوى لما مرة بالصدفة دخلت عند ساعة عصاري بعد غيابها لفترة ولقيتها كاتبة بوست
جايبة فى سيرتى بجد فرحت اوى ..

*******

مع كل بوست كنت بكتبه كنت بحاول اطلع كل اللى جوايا فى احسن شكل ممكن
لانى مقتنع ان محدش هيحب يقرا حاجة اسلوبها وحش او تقليدي
الحمد لله حاسس انى ماشي فى الطريق الصح وكان من اكبر الدلائل على انى ماشي فى الطريق الصح
ان مدون زى احمد شقير اختار بوست وما الدنيا الا مسلسل كبير كافضل بوست
وده ادانى حافز معنوى كبير جدا لانى عارف احمد مش بيجامل

*******

زى ما قلتلكوا السنة دى غيرت فكرتى عن حاجات كتير اوى .. اللى يقول ان التدوين تضيع وقت يبقي ميعرفش يعنى ايه تدوين
التدوين حالة من المصارحة مع النفس والكلام بحرية بدون قيود من اجمل الحالات التى ينتشي فيها المدون
ويشعر بالسعادة عندما تقابل كلماته بالمناقشة او المدح او حتى الاستهجان فذلك ليس له الا معنى واحد انه
يوجد من يقرأ لك ويتابعك ..
مجرد معرفة المدونين والتواصل معهم شيء رائع .. صحيح انا لحد دلوقتى مشفتش حد منهم
لكن انا متخيل لكل واحد منهم شكل من اسلوبه وكلامه وردوده
كنت اريد توجيه كلمات لاصدقائي من المدونين لكن مش عاوز انسي حد
انا بس عاوز اقول انى سعيد بمعرفتكم جميعا .. واعتذر لاى حد اكون غلط فيه بدون قصد
ومسامح اى حد غلط فيا .. واتمنى للكل الخير ودوام السعادة

*******

كنت اتمنى ان احتفل بتتويج الاهلى بطلا للقارة الافرقية للمرة الثالثة على التوالى
لكن مفيش نصيب بقي .. الحمد لله على كل شيء
صحيح اضايقت جدا لضياع البطولة
لكن اللى ضايقنى اكتر تصرفات الجماهير بعد الماتش
مش دى جماهير الاهلى اللى انا عارفها
جماهير الاهلى اعلى واحسن من كده لكن يبقي التعصب مرضا
فى دماء العرب سواء فى سياسة او حتى فى الرياضة
امنيتى ان السنة اللى جاية ان شاء الله يتوج الاهلى مرة اخرى بطلا للقارة السمراء
واعتذر لاى شخص سببت له كتاباتى فى الرياضة ضيقا
او نرفزة .. واعدكم بالهدوء
لكن انا برده اهلاوى علطووول

تحياتى للجميع

********
تحديث اسعدنى جداااا
تهنئة من بيلا مدونة (افكار مبعثرة) كانت اكثر من رائعة
من القلب اشكرك يا بيلا صديقة عزيزة ومدونة احرص على متابعتها

هدية بيلا :)

********