يلــعــن ابو الامتحانات

ياااااااه وحشتووووونى اووووى يخربيت الامتحانات وسنينها ..
دا انا طلعت عينى ايام الامتحانات اولا انا مش حاسس لحد دلوقتى اننا دخلنا الامتحانات
وخلصنا كمان مش عشان كنا بنذاكر ولا حاجة لسمح الله لكن
ده علشان كنا مقضينها هزار انا والواد عجرودى ... عجرودى ده سديكى العزيز ....
كنت لاجىء عنده فى البيت من الصبح لحد بليل عشان المفروض اننا بنذاكر
لكن مفيش اى حد مننا عنده دم نفضل نهزر ونكلم ولا اكن عندنا امتحان بكره
الصبح مثلا ايام حلوة اوى والله .. فعلا محسيناش بالوقت .. فى دكتور
كده بيدينا مواد المحاسبة اللى عندنا فى الكلية .. هو مش دكتور
ولا حاجة بس هو مدرس ثانوى تجارى وبيدرس المواد اللى
عندنا فى الكلية احسن من الدكاترة نفسهم .. بس ايه راجل اشتغالة
.. هههههههه انا وعجرودى مش بنسيبه فى حاله مطلعين عينه من
سنة تانية لحد دلوقتى 3 سنين الراجل بيحلف بيهم ..
سمانا مجموعة الموت عشان بنعمل فيه عمايل سوده
.. واللى بيغيظه اننا
بنصورله اللى بيحصل فى الحصة ونفضحه فى وسط الناس ..
نفضل نشتغله ونهزر لحد ميتنرفز وينهار ... ههههههه ساعات
ميقدرش يقاوم ويفضل يضحك .. المهم رحنا مرة ليلة المراجعة
يعنى عندنا امتحان الصبح وكبرت فى دماغى انا وعجرودى اننا
نهزر ونقلب الحصة ضحك .. وده تصوير للي حصل معلش
بقي يا بو الدكاتير الفقرة دى اتصورت لو عاوز تذيع قول ذيع
لو مش عاوز هنذيع غصب عنك ....

طبعا انا اللى عملت الفيديو بالشكل ده علشان
فى بنات معانا فى الدرس وكده بقي

انا اللى قاعد فى النص بين الولد والبنت .. كبرت فى دماغي وانا قاعد
كده انى اخلى الواد اللى جنبي ده يبوس ايدي ... ههههههه
اه والله قلت لعجرودى يجهز عشان يصور عشان هخلى الواد عدلى يبوس ايدى
المهم عجرودى بدأ يصور وانا عمال ادى ايدي لعدلى واقوله بوس ايدي يا عدلى
ههههههه .. والواد عدلى يضحك اقوله ياض بقولك بوس ايدي يلا
وهو يضحك المهم فضلت اشتغله شويه لحد ما البرنس الدكتور خد باله
وانفجر فينا .. ههههههههه
ويقولنا يا جدعان حرام عليكو دحنا ليلة الامتحان الله يخرب بيوتكم انتو اييييييييييه مبتحسوش .. انتوا معندكوش دم وانا اضحك وعجرودى يصور والدكتور شوية وهيلطم ..

والصبح لبسنا امتحان عسل .. ماده اسمها محاسبة دولية
لو الناس شافوا الحل اللى حليناه هيرجعونا على الاقل سنة 2 اعدادى
وروحنا بعد الامتحان على الدكتور بتاع الدرس فى بيته وقلتله على اللى حليته
صرخ فيا وقاللى يا بنى انت عاوز تشلنى
انت عاوز تجيبلي الضغط .. حرااام عليكووو
وانا وعجرودى نضضضضحك
... والراجل كان هيغمى عليه ... هههههه

برده كان فى ليلة من ليالى الامتحان الجميلة
صادفت يوم عيد ميلاد عجرودى .. وطبعا سيبنا المذاكرة
وعملتله عيد ميلاد واحنا بنذاكر
وقلبنا الشاي وعملنا عمايل هباب
والمفروض ان الامتحان الساعة 10 الصبح ..ههههه
بس عادى جدا ولا بنتهز

الفيديو اللى فات ده كنت انا وعجرودى بنهزر ورحت حبسته فى البلكونة
وقعدت بره فى الاوضة اغنى خاف الله خاف على الجيتار ... ههههههههه
وكان عندنا امتحان بعديها بيوم .. وعادى جدا ولا بيهمنا ..

احلى حاجة بتبقي يوم الامتحان الصبح .. الامتحان اصله بيبقي الساعة عشرة الصبح .. فبروح لواحد صاحبي الصبح اسمه حمدى .... حمدى سديك عزيز اخر زي العسل .... بدلعه واقوله حنتشى ... بروحله على الساعة 8:30 او 9 كده عشان نراجع شوية مع بعض بس برده مفيش فايدة .. مجرد ما نفتكر اى حاجة من اللى حصلتلنا قبل كده نفضل نضحك بنتلكك من الاخر عشان نضحك .. وسؤالنا التقليدى كل يوم امتحان الصبح اسأل حمدى اقوله تفتكر فيه فايدة يا حنتشي؟ .. يقوللى لأ مفيش فايدة او لو بيستظرف يقولى اه فى فايدة 2.5 % ونفضل نضحك بعديها

وننزل على الساعة 9:30 كده نروح على الجامعة
ونستقبل الامتحان بصدر رحب .. احلى تعليق سمعته من حنتشي بعد الامتحان
بقوله ها عملت ايه فى الامتحان ده .. وكان امتحان منيل لقيت حنتشي بيضحك ويقول الامتحان ده قمة فى الكوميديا ..

ههههههههههه .. صباح التعليق .. امتحان قمة فى الكوميديا

والله ربنا يسترها معانا فى النتيجة .. لحسن احنا
بالمستوى ده هنطلع من الدور الاول لبطولة الامتحانات
اصل الامتحانات دى زى الكورة يوم تصيب ويوم تخيب
ولحد دلوقتى مصابتش .. فربنا يسهل بقي فى النتيجة

كنت بفكر انى اصور اللجنة فيديو واصور الهبل اللى بيحصل جوه من تأخير للورق وتناحة المراقبين واصور ورقة الامتحان بتاعتى بس للاسف معرفتش كنت هروح فداهية بس تتعوض ان شاء الله ...


والله وحشتووووووووونى اوى ..
وشكرا لكل اللى دعولى وسألوا عنى ..
يا رب يوفقكم انتوا كمان
وادعولى عشان النتيجة بقي


سلاااااااامز ;)