News

Sunday, August 19, 2007

قــللبه يا فوزى


منذ فترة ليست بالبعيدة .. ما لا يزيد عن اسبوعين على الاكثر .. كنت فى طريقي للقاء
احد اصدقائي بمحطة مترو الدقى ..

وجائتنى مكالمة من صديقي بانه قد حدثت واقعة سرقة موبايل فى محطة دار السلام
لدكتورة تربطنا بها علاقة دراسة ومعرفة .. وعلى الفور تقابلت انا ووجيه - صديقي - واتجهنا
الى محطة مترو طرة البلد حيث نقطة الشرطة المختصة بحوادث السرقة وتتبعها محطة دار السلام

دخلنا الى النقطة واطمئنينا على الدكتورة وانه تم القبض على الحرامى وباقي اجراءات المحضر

اثناء انهاء اجراءات المحضر جلست انا ووجيه فى مكتب احد امناء الشرطة .. وكان مؤدب معانا
وخدوا بالكوا من معانا دى اوى ... كان مؤدب معانا اوى وعزمنا على شاي لحد ما المحضر بتاع السرقة يخلص ..

وخلال الوقت اللى كنا قاعدين فيه عنده لقينا امين شرطة تانى ساحب عيل صغير ماسك كيس اسود فى ايده وعمال يعيط

ومعرفش ايه اللى خلانى اسجل الحوار ده .. بس اهو حصل واتسجل وهو ده بالنص اللى اتقال
وفى تسجيل بالصوت عشان اللى عاوز يسمع ..


نص الحوار ....

امين الشرطة : خش يا .. خش يالا انت هتعيط
امين شرطة تانى : مين اللى جابو الامين هشام ولا حد تانى
ايه البلوة اللى انت عملتها .. كان بيعمل ايه ده
عسكرى : كان بيبيع دبابيس يا باشا
الواد الصغير : والنبي يا باشا انا معملتش حاجة
امين الشرطة : عشان تحرم خد منه 10 جنيه وقعده هنا
الواد الصغير : والنبي يا باشا انا لسه ما بعتش يا باشا
امين الشرطة : طلع العشرة جنيه من سكات .. قلبه يا فوزى
الواد الصغير : والنبي يا باشا
امين الشرطة : خد منه 10 جنيه يا فوزى واعمله محضر .. جرى ايه ياد متقف عدل

ويلتفت الي امين الشرطة انا ووجيه ويحدف لنا بعض الدبابيس على سبيل الدعابة

انا وانا مخنوق : وهعمل بيها ايه الدبابيس يا عم انت
امين الشرطة: وهو بيحدف باقي الدبابيس وبيوزعها على القسم كله اعمل بيها اى حاجه دى دبابيس متخسرش

الواد الصغير : والنبي يا باشا والله العظيم مظلوم
امين الشرطة : انت مش اتمسكت ياد فى غرامه وفى محضر

خد منه 10 جنيه يا فوزى واعمل المحضر

فوزى : انا هاخد 15 جنيه
الواد الصغير : والنبي يا باشا دى مش فلوسي يا باشا

امين الشرطة : ما خلاص فيه ايه طيب اسمك ايه ياد

الواد الصغير : سعيد السيد يا باشا

امين الشرطة : اعمل محضر باسم سعيد السيد ودخله الزنزانة وسيب الباب مفتوح
خد ياد هات عشرة جنيه وخد باقى الفلوس اهه ( وانا مكنتش شايف باقي للفلوس ) خد يالا

امين الشرطة : 10 جنيه يا فوزى واعمل محضر .. وغرامة شرطة يا فوزى

امين الشرطة يشاور على واحد من العساكر ويقول للواد الصغير لو قلت ان العسكرى ده هو اللى جابك همشيك
وامين الشرطة بيستخف دمه بالحكايه دى يعنى .. والواد الصغير خايف من الاتنين العسكرى والامين
وراح قايل للامين : لا مش هو يا باشا

امين الشرطة راح مدخله الزنزانه وقاله طب خليك هنا بقي


انتهى ،،،،

---------------

يعنى اخدوا منه الفلوس والحاجات اللى بيبيعها .. وبيتريقوا عليه وهو عيل صغير ميجبش 9 - 10 سنين
وكان واقف ميت من الخوف .. حرام ده ولا حلال .. للاسف معرفتش اصور الموقف ده .. الولد الصغير كان فعلا
شكله يصعب على الكافر .. على الكافر اه وعلى الشرطة لأ ...

---------------


تسجيل صوتى للى حصل بالظبط فى القسم مع الولد الصغير ..







******


16 comments:

Nani said...

السلام عليكم
ربنا على الظالم
بس انا حاولت اسمع التسجيل بس مكانش في صوت ابدا
ممكن لو سمحت تعملوا م تاني

islamz said...

nani
----

وعليكم السلام والرحمة
تمت تعديل التسجيل الصوتى ..

وامين يا رب

تحياتى :]

Nadine Alfred said...

عادى
هو ده بقى النظام دلوقتى
إحترموكوا و كرموكوا عشان اليومين دول الدنيا قالبة عليهم
و قالوا بلا وجع دماغ
و يروحوكوا مبسوطين و خلاص

انما الولد الصغير ده مافيش اللى يدافع عنه او حتى يحميه
يبقى يلا نستقوى عليه و نكسر عضمه
.........

كل واحد بيدور عالأضعف منه عشان يستقوى عليه
و السمك الكبير بينهش فى لحم الصغير

islamz said...

نادين :
------
وتفتكرى قانون الغابة ده هيفضل ماشي على طول .. ولا دى بداية النهاية ؟؟

حائر في دنيا الله said...

عارف لما الواد الصغير دا يفجر نفسه في فوزي وأقسام الشريطة تلك بصراحة أنا لن ألومه وربما أتعاطف معه
بصراحة ما سمعته في الشهر الأخير فقط أهدر في ذهني وضميري دم كل هؤلاء المفترييييييييييييين

لك تحياتي
السلام عليكم

. said...

الرحممممممممممممممممممممممة الرحمممممممممممممممممممممممممة
بلد ايه دي
نظام ايه ده
ناس مين الي شعب على نياتو
مصر ايه دي اساسا
ولا حاجة

islamz said...

حائر :
-----

ولما يفجر نفسه يقولك ارهابي وممول ويجيبه اهله واللى جابوا اهله والجيران وجيران الجيران ويطلعوا عينهم بدون البحث عن السبب الاصلي .. السبب الاصلي الذى قد يفجر مثل هذا الحدث هو الظلم الواقع من الشرطة كجهاز وأفراد واحساسهم بانهم ملكوا المجتمع دون وازع من دين او ضمير ..

اتوقع كارثة حقيقية قريبا جدا .. وربنا ستار ..

تحياتى لك ايضا
وعليكم السلام والرحمة

islamz said...

سدرة :
-----

ومن اين تاتى الرحمة فى بلد نسي اهلها معنى الرحمة . احنا مبنرحمش بعض
والحكومة مبترحمناش .. هنعرف منين الكلمة دى ... اوافقك على هجاء الشعب المصري
والغضب منه .. اوافقك على لعن النظام
وابو اللى جاب النظام ..

لكن مصر منهينهاش .. مصر كل حاجة مش ولا حاجة .. ان كانت واقعة فهى واقعة بسببنا .. وهتقوم بينا كلنا ان شاء الله .. ولا ايه .. خللى عندك امل ... متسوديهاش اوى كده

تحياتى

أُكتب بالرصاص said...

تفتكر في امل؟

الواد امين الشرطة دا أكيد وهو صغير في عمر الواد دا
كان كدا


لذلك لا نستغرب بعد عشر سنين ان الواد يدخل معهد امناء الشرطة
ويطلع يعمل اللي اتعمل فيه
يعني يطلع عقده على الخلق



تحياتي لك يا خطوة عزيزة

islamz said...

تامر :
-----

تصدق بالله عندك حق .. ويبقي عمرنا ما هنخلص من من المشكلة دى .. جيل من بعد جيل بيورث الظلم والغل والحقد .. طب وبعدين ..

ربنا يستر ...


وتحياتى لك .. والف مبروك على الوليد الجديد ... :]

Eslam Abuelgasim said...

يمكن ان اتفهم موقف أمين الشرطة وطريقته لكن لا يمكن أن افهم لماذا نحن فقط متفرجين لماذا لم تدافع عنه وانت ترى الخوف في عينيه انا شخصيا اصبحت لا اطيق ان اشم هذه الرائحة الكريهة وافعل ما استطيع عليه ولكن انتم تستطيعوا ان تفعلوا الكثير كل واحد يعمل اللي عليه ونتحرك من متفرجين لفعاليين .. أعتقد ان شوية شوي راح يحس الظالم أن لا مكان له

islamz said...

sudan hills
-----------

هل تصدقنى ان قلت لك لا ادرى لماذا تلجم لسانى ولم اتحرك .. اكتفيت بالمشاهدة وتسجيل ما يحدث .. اعترف بانى صمت فى وقت كان يمكن ان اتكلم فيه
ولكن اعاهدك بعدم السكوت مرة اخرى

تحياتى

غمض عينيك said...

اديك قلتها يصعب ع الكافر انما الشرطة لا
ربنا ع الظالم

islamz said...

ابو سمرة
--------

اميييييين يا عم سمير ..

البنت الشلبية said...

ازيك يا اسلام باشا
بجد مش هقول غير حسبى الله ونعم الوكيل
الناس دى ملهاش حل غير العذاب اثناء الموت وبعد الموت لكن عشان لا شماتة فى الموت
هقول ربنا يورينا فيهم آياته
شكرا ليك

islamz said...

شلبية ..
-------

فعلا ربنا يورينا فيهم اياته ..

تحياتى :]