News

Monday, August 27, 2007

!!! القومبيوطر والانطرنط



قالك التنسيق الالكترونى وانتهى عصر طوابير الطلبة على مكتب التنسيق
كل طالب مجرد يدخل على النت ويحط رقمه السري - واوعى يا شاطر واوعى يا شاطرة
حد ياخد رقمك السري لحسن يخلصلك مجموعك فى الرنات والرسايل - اتبعوا اسلوب الفهلوة
ولم يعترفوا بأمية الموظفين قبل معظم الطلبة فى الستخدام الحاسب الالى او ما سمعتهم
يتلفظون باسمه - القومبيوطر - الموظفين الموجودين بجميع الوزارات لن اقول جميعهم بل سأقول اغلبهم وهو تقريبا 70 % منهم
لا يعلم كيفية التعامل مع الجهاز اللوزعى المسمي القومبيوطر ..
يعنى من الاخر لو لعبوا جيم سناك على الموبايل يبقي
زى الفل على كده -- مش يقولولنا سوف يتعامل الموظفين مع الملفات الالكترونية للطلبة كده مرة واحدة
كده من غير برامج تأهيل ولا تدريب ولا اى نيلة - ومعنى هذا الكلام ان لم يكن ضياع مستقبل
طلبة فى غياهب الحكومة الالكترونية ومحاولة التعديل للملفات الالكترونية ..
سوف يكون تعطيل لا مفر منه للطلبة اصحاب
الملفات التى تحتاج للتعديل والاضافة او الحذف

*****

قالك الشفافية منهجنا وكل مسؤول يتم اختياره على اسس وقيم ومش عارف ايه وايه وايه
وعليه قام مسؤول باحد المدارس بنزع الرقم السرى الخاص بالطلاب من على المظاريف المخصصة لهم !!!
تفتكروا ليييييه ؟؟؟ عشان البيه المحترم ياخد خطوط الموبايل اللى مقدماها موبينيل لطلبة الثانوية السنة دى
على سبيل الهدية ... منتهى الاستغلالية والغباء والفهلوة .. منتهى دناءة التنفس


وارى ان مبدأ الشفافية هذا لم يطبقه سوى هيفا وهبي او مروى ولا نانسي عجرم
اما حكومتنا العزيزة فهى بتحاول تتعلم ... وخايفة


ارحموووووووونا من الفهلوة والغباء
عشان بجد زهقنا ..

*****

16 comments:

عصفور المدينة said...

:)
قال شفافية قال
فكرتيني بشفافية صناديق الانتخابات

sad_doraa said...

قومبيوطر
يعني (يوطر) بس (قومبو) هيا على قد ماهي خدمة جميلة بدل الطوابير والقرف الا ان دي اكيد لها مغزى تاني غير خدمة الشعب
لانو معلش يعني احنا مش متعودين ع الدلال ده كده في دلع زيادة عن اللزوم
يعني الي جالها هندسة وهيا فادبي وجايبة 81 لو شوفتها فالبيت بيتك دي حاجة كميلة خالص
يارب تحصل معاياي الغلطة دي يمكن يجيلي طب وانا مش واخدة بالي
اسلامز
انتا كده هتجننا
ممكن تبطل الحاجات المهمة الي بتوجعنا دي عشان انا بزعل على البلد دي كل ما اخش عندك
:(
سدرة

EMY said...

طبعا يا جماعة ماحدش يقدر ينكر ان خطوة الكمبيوتر و الانترنت في بلدناخطوة هايلة و ممتازة..
بس للأسف زي أي حاجة بتتعمل في بلدنافهي بتتطبق خبط لزق كده من غير مايكون فيه مقدمات و لا تهييآت و لا تدريبات أو زي مايكون المسؤلين بتوعنا فاكرين نفسهم بيتعاملوا مع موظفين اوروبا و الدول المتقدمة، ناسيين او متناسيين ان شعب البلد الغلبان ده بقى لهم عشرات من السنين و يمكن قرون مايعرفوش في أشغالهم غير الدفاتر و الأوراق و الامضاءات و الدمغات !!و طبعا قوانين البيروقراطية اللي بقت متوارثة من موظف للتاني من غير مايفكر هية اتعملت ليه و لا تتطبق صح ازاي!!
يعني من الآخر كده زي أي حاجة بتتعمل في بلدنافهي بتتعمل من غير نظام أو تنظيم "واقعي"!!

Amr Ahmed said...

الشفافية المصرية

زي الاشباح

سمعنا عنها كتير

لكن عمرنا ما شوفناها

islamz said...

عصفور المدينة
-----------

يااااه انت لسه مصدق انها كانت شفافة ... ده كان لون من بره ههههههههههه

دنا لحد دلوقتى مش عارف الشفافية فى مصرنا الحبيبة جاية من اى اتجاه عشان اقابلها بالاحضان .....

:]

islamz said...

سدورة
-----
لا بقي قومبويوطر كلها على بعضها حتة وحدة .. وبمناسبة البنوتة الكميلة اللى دخلت هندسة وهى فى ادبي وكمان جايبة 81% يبقي الليمبي مكدبش لما قال انه اخد نقيب من اولى ثانوى ههههههههههههه

وبعدين تعالى هنا ابطل ايه فاتحين محل فول هنا ولا ايه .. وبعدين ده فى ناس بتقول بلاوى اكتر من كده ويمكن صوتنا يوصل

وابطل واقعد اعمل ليه .. على راى عادل امام " اشتغل قاصة بقي انا ولا ايه " تحيااتى يا سدوورة

:]

islamz said...

emy العزيزة
-----------
تفتكرى المشكلة فى الترتيبات والتجهيزات والحاجات دى بس .. ولا ان الموظف المصري بيوصل لمرحلة التشبع وبعدها مرحلة الغباء الوظيفي .. واتعودنا على الدفاتر الورق والفهلوة وشيلنى واشيلك
ربنا يستر يا ايمي ..

تحياتى :]

islamz said...

عموور
-----
اقدر اختصرلك كلامك فى كلمة واحدة " اااااعععععوووووووو ااااا "

صوت اشباح .. يعنى الشفافية جاية .. ههههههههه

ياسمين said...

فعلا فى امية كمبيوترية فى جميع المصالح الحكومية لدرجة انى ساعات وأنا واقفة قدام الموظف بأكون عايزة اقومه وأقعد مكانه ادخل البيانات عشان اخلص

تحياتى

غمض عينيك said...

ياباشا الفهلوة والمهلبية والشطارة بقت عاده الشعب المصري

هي دي مصر

islamz said...

ياسمين
----

وياريت الموظف يرضي .. تلاقيه هيقولك ايه انتى هتعلمينا شغلنا مع ادنى ملاحظة

منورة يا ياسوو :]

islamz said...

ابو سمرة
-------

طب وبعدين يا عم سمير هنفضل نقول عادة على كل حاجة بذمتك متهقطش ..
لا يا عم مش هى دى مصر .. هو انا كل ما اقول حاجة غلط تقولوا هى دى مصر
مصر زيها زى اى بلد كويسة بشعبها ووحشه برضه بيه .. يعنى العيب من عندنا

ولا ايه يابوسمرة

غمض عينيك said...

ماهو ياباشا مصر دي مش حيطان واراضي وبيوت وعمارات وكباري
مصر دي شعب وناس هما اللي بيخلوها زي ماهي
معاك مصر مظلومة بناسها بس للاسف بردو اسمهها مصر

كل لا يتجزأ

تحياتي ليك
واحتراماتي
محمد سمير

islamz said...

سمير
--

عندك حق يابو سمرة
بس مش مصر دى برده اللى كان بيتعملها الف حساب ايام عبد الناصر
مش مصر اللى كانت ليها كلمة وهيبة

مين اللى ضيعها .. تفتكر مين احنا ولا ده نتاج ناس سبقونا ..

الحالة اللى الشعب فيها من الكسل والخمول واللامبالاة مين السبب فيها ؟؟؟؟؟؟


تحياتى يا بوسمرة :]

Bella said...

يعني بس يااسلام بتتكلم في ايه

دي سبوبة ياسيدي وكلنا عارفين ان اي حاجة تيجي من طرفهم بيكون فيها إن
والتنسيق الالكتروني بالذات فيه إن وكان وكل الحروف الناسخة

ربنا يهدهم وينتقم منهم على المهازل اللى حصلت في التنسيق

وحكاية التوزيع الجغرافي دي كمان كانت مصيبة تانية من مصايب الحكومة الالكترونية الحلزونية

التعليم في مصر مات وانتهي وجثته تحللت كمان

قلم جاف said...

فكرة التنسيق نفسها حلزونية .. فلماذا قررت الوزارة ربطها بالتكنولوجيا؟ الموضوع صار أشبه باستخدام لاب توب في فتح المندل!