News

Thursday, January 17, 2008

زفاف ، عزاء ، سبوع وطهور كمان



لم يكن التدوين يوما من الايام بالنسبة لى على الاقل مجرد اداة للتهنئة
بالعيد او بدخول سنة جديدة ميلادية او هجرية .. او التهنئة بيوم عاشوراء
واتكلم عن نفسي ولكم حرية الموافقة او الرفض .. صحيح اننى قمت بالتهنئة فى الاعياد
وفى بداية السنة السابقة 2007 ولكن ليس معنى ذلك اننى قد دخلت عالم التدوين لمجرد التهانئ
وتلقى المباركات .. والا فسأكتب على مدونتى دار مناسبات نقبل الافراح واعياد الميلاد
والعزاء والسبوع .. والخ الخ الخ ..

انا شايف شاب زى العسل ورا اهو بيقولى طب ويا استاذ اسلام واحنا مالنا تكتب ولا تهنى الناس
ولا عنك ما كتبت التهانى دى حاجة ترجعلك يعنى .. اقوله متشكرين يا بن الناس الكويسين
بس انا بقول كده عشان لقيت كام ايميل بيقولولى انى بقيت مهمل فى التدوين وخلاص مبقاش عندى حاجة جديدة
ولا حتى افتكرت انى اقول كل سنة وانوا طيبين فى السنة الميلادية او الهجرية

طب ليه بس الاحباط ده يا جدعان ..
انا قلتلكم على قصدى من التدوين .. تعبير عن افكار بتاعتى وبس
يعنى لمؤاخذة مش مستنى حد يقولى اكتب ايه ومتكتبش ايه ..
واللى عاوز كده يروح ما يطلبه المستمعون .. اسغفر الله العظيم يا رب

اما بعد ... بعد ما 2008 هلت علينا .. و1429 جت ببركتها
واغتيال بنظير مبوتو .. وسباق الانتخابات الامريكية
وانتظارنا للمعجزة اللى هتكسبنا كأس الامم الافريقية
وبعد ما ساركوزى بلبط فى شرم هو والمزة
والاهلى طلع من الكاس من دور ال32
وانفلونزا الطيور ورجعت اشرس من الاول
والاسعار بقت نار زى ما الحكومة وعدت بضبط الاسعار بالظبط

دا انا سمعت ان العيش مش هيتباع رغيف رغيف بعد كده
بعد حجم الرغيف الجديد انه هيبقي شرايط الشريط فى عشرين رغيف

وهو ده التطور الطبيعى لرغيف العيش المصري .. وعلى شرط الشريط ده هيبقي بعشرين جنيه بس
عشان محدودى الدخل ..

مش بقولوكوا متخافوش دحنا داخلين على ايام زى العسل ...
المهم بس اننا نستحمل كده شوة صغننين اد 20 ولا 30 سنة كمان ايه اللى هيحصل
يعنى وهتشوفوا مصر دى احد النمور الافريقية ( تصريح للسيد نظيف ) ايه رأيكم بقي

وبالمناسبة .. حسن شحاتة بعت تهديد لاتوفيستر مدرب الكاميرون
على طريقة السقا فى الجزيرة ..
حسن شحاتة قاله : حدانا فى البلد لما العيال بيلعبوا مصر والكاميرون .. الكاميرون هو اللى بيستخبا

تمنياتى للمنتخب بالتوفيق ان شاء الله

وكل سنة وانتوا طيبين ... :]

******

13 comments:

عصفور المدينة said...

معاك ومؤيد لنظريتك بس انت خالفتها

*.* HoNdA *.* said...

السلام عليكم
طبعا انا احترم رايك لسبب ان المدونة فى الاصل حاجة شخصيه ومش المفروض ان احنا الى نقولك انت تكتب ايه وايه لا
بس اما حد بيقولك حاجة اكيد لانه بيحب المدونة وعايز يقرالك كتير مش اكتر
بس كده او كده انت وضحت واى مدون ليه اسلوبه وتفكيره ىف التعامل مع مدونته
كل سنة ومصر بخير

ihapoof said...

7elwa 7kayet shreet el 3esh de :)

w bomonasbet tasree7 7asan sh7ata ..
by2ollak Mortada mansoor 2al ba3d ma7'arag mn el segn " Mn el naharda mafesh zamalek ana el zamalek " ;)

nice post

sad_doraa said...

مالك يا عم داخل علينا حامي كده ليه في ايه بس
ايوة بقة انتا بقيت مهمل اهمال فظيع مع ان و(يا بختك)لا دراسة ولا حاجة
ده نق خلي بالك
بجد يا ايلام بعد ما كنت منورني فالبلوج على طول بطلت بعد ماكان ميفوتش اسبوع الا والاقي بوست جديد مفيش
يعني ناس معاها حق يعني

وعلى فكرة الفكرة الي بتتكلم عليها دي مش بعيد تتطبق لان احنا بعد كدا هنبقى بناخد اقراص لكل المواد الغذائية منتا عارف الشعب مش فاضي يحش في المحشي ولا في الفول
ورانا تطوير وتنمية
تحياتي

islamz said...

عصفور باشا
----------
واحشنى جدا اولا

ثانيا بقي انا مخالفتش النظرية ولا حاجة .. بس انا برده كنت عاوز اقول وجهة نظرى وفى نفس الوقت اقول كل سنة وانتوا طيبين يعنى من نفسي :]

ومنور يا صديقي العزيز جدا .. وكنت متأكد من انك اول واحد هيسيب كومنت والله .. :]

تحياتى

islamz said...

هوندا
-----
اولا اهلا بيكى صديقة جديدة :]
منورة ..

ومدونتك جميلة وجديدة وعجبتنى جدا
انا عارف ان كلامك صح ومش هخبي عليكى انا بفرح زى اى حد لما الاقي حد بيقرالى ومهتم .. بس انتى ايه رايك فى حد بيهاجمك اوى من غير ميفهم ظروفك مش هتزعلى

عموما كل سنة وانتى طيبة وكل المدونين بخير وخلينا نشوفك :]

islamz said...

ايهابوووف
---------
اولا احييك على اغنية منير الروعة اللى انت حاططها على البلوج عندك ..
ويا سيدى انا متوقع الشريط بتاع العيش
ده ينزل قريب .. منور يا ايهابووف باشا
وسلملى على مرتضي منصور والزملكاوية الغلبانين .. وتحيا الروح الرياضية ..
اهلاوى جدا جدا جدا ..

islamz said...

سدووووورةةةةة
-------------
اختيييييي العزيزة اوييييييي
والله انا كنت مكسور بس متقوليش لحد
شفتى بقي انى مكنتش مهمل بمزاجى ..
انا عارف انى مقصر مع الكل والله بس
انا راجع معاكوا اهو ان شاء الله وطول ما فى ناس حلوين زيك كده بيسألوا ولا يهمنى
كسر ولا اى حاجة .. المهم انتى تذاكرى كويس وتطمنينى عليكى وان شاء الله تبقي زى الفل ..

تحياتى لاختى العزيزة سدورة الجميلة :]

Memo said...

تهنئه خاصة لسوسو وماما لبني و فتنا و امنيةو ماما سهير وبابا فوزي و نينه سعاد و حمادة ابن طنط فوزية بمناسبة طهور بيبو

smraa alnil said...

ههههههههه

يا دماغك يا عبد الستار

قصدي يا اسلام

فينك يا واد

علي فكرة طنط ظاظا عندها طهور اعملها تدوينة تمام بقي

Ellithy said...

مدونة كل المدونين العرب .. جريدة كل العرب

انت مدعو للكتابة في مدونة كل العرب
مشروع الجريدة العربية الموحدة
تكمن فكرة هذه المدونة لجمع اكبر قدر من المدونين العرب واقدرهم وافصلهم لكي يكتبو في مكان واحد
ذلك للحصول في النهاية على مدونة اشبه بالجريدة العربية تناقش القضا ياالعربية وخلافات العرب حيث ان كل الطوائف والبلاد مدعوة للكتابة
وقد تكون نقطة انطلاق للتفاهم والنقاش حول القضايا العربية المختلفة وتقابل وجهات النظر

للمشاركة ارسل ايميلك (بريدك الالكتروني) في تعليق على هذا المقال وسوف تتلقى دعوة للكتابة في هذه المدونة

مزايا الكتابة هنا :
للكاتب :
1- عدد اكبر من القراء
2- تحسين نتايج البحث لعناوين المقالات
3- انت كاتب وفي نفس الوقت قارئ تقرأ ما يكتبه كبار المدونين العرب
4- شهرة اكبر .. ودائما اقول ان في الاتحاد قوة وهذا هو اتحاد المدونين العرب

للقارئ :
1- القراءة للمدونين الكبار تحت صفحة واحدة
2- تجميع المدونات وجعلها مث ل جريدة الكترونية
3- سهولة الوصول للمقالات المرادة

شروط الكتابة (لن يتم التعديل لو مسح اي مقال ):
1- عدم الاساءة للاديان السماوية
2- عدم نشر مقال من اجل ربح المال او التنفع المادي ولكن الشروحات مقبولة ومرحب بها
3- عدم كتابة كلام خارج او الفاظ اباحية
4- الكتابة باللغة العربية

الفكرة تتلخص في ان كل مدون له حق الكتابة فقط بارسال ايميله في تعليق على هذه المدونة
اذا كانت لك مدونتك الخاصة فلا مانع من نسخ مقالاتك الهامة والتي تراها ترقى كي تكون في الجريدة العربية الالكترونية او مدونة كل العرب

وانا شخصيا ساكتب في مواضيع مختلفة وساهتم بتحقيق افضل نتائج للبحث والحصول على اكبر قدر من الزوار حتى تصل مقالاتك لاكبر عدد من القراء
كما ان تجمع المدونين سيجيئ بقراء اكثر وهكذا

برجاء ارسل لنا بريدك الالكتروني كي تستطيع الكتابة في هذه المدونة
ادعو الله ان تكون هذه المدونة ملفتة لنظر القراء ومحط انظار الراي العام العربي
مشروع الجريدة العربية الموحدة

والله ولي التوفيق

islamz said...

ميمو
----
دنتى جاية تعملى فرح بجد بقي
عموما منورة انتى وبيبو .. هههههههه


سمووورة
------
قال طنط ظاظا قال
ابلة ظاظا ميييييين

انتى اللى فينك يا سموورة .. وطارق عامل ايه ..

أمل فتحى عزت said...

اسعدنى المرور بمدونتك وأتمنى لك التقدم والمزيد من الاهداف النبيلة


كما أدعوك لزيارة مدونتى والتى محتواها


تعالوا نسافر المسافات الى زمن من المحبة لاينتهى


كما أدعوك لقرأة قصتى


(بكل لغات العالم أحبك)