!!! مع مصر الكيف مقاولة مش مناولة

بلدنا فى القلوب متشالة ، يا حبيبتى يا مصر ، والله وعملوها الرجالة ، لو سألتك انت صينى تقوللى ايه
اوباااااااااااااااااااااااااا هو ده ... قالك الكورة افيونة الشعب المصري
طب وماله احنا شعب افيونجى كورة ... بس مع ابطال افريقيا عفواااااا

الكيف مقاولة مش مناولة ...

ولنا الفخر ... احلى ايام بتعدى على مصر الايام اللى فيها المنتخب بيلعب كلنا بنشوف العلم علطول فى كل حتة
عربيات ، ميكروباصات ، بلكونات ، وفى ايدين الناس فى الشارع
اغانى وطنية كنا قربنا ننساها ... حاجات كتيرة اوى حسينا بيها غير شعورنا بفرحة الفوز

احساس انك بطل ده احساس جميل

احساس ان البلد كلها ملمومة على هدف واحد ده بيدي امل فى حاجات كتير

احساس انك ربنا اخدلك حقك من اللى ظلمك وهانك ده شعور رائع خاصة بعد ما كانت الدنيا نامت على الموضوع اياه

بدون فزلكة وكلام كتير الفرحة بالانتصار لا يعادله اى شعور

تحيا مصر يا عم


****

ومازال العطاء مستمرا

فى عيد ميلادك الـ 82
نبتدى منين الحكاية .. ده تاريخ يا اخوانا

سوء التعليم ، الصحة ، المواصلات ، الغذاء

توشكى

حوادث القطارات

غرق العبارة

حريق مجلس الشورى


الاحتكار

ازمة السلع الاساسية

انفلونزا الطيور


المبيدات المسرطنة

البان الاطفال المسرطنة

تجاوزات اسرائيل على الحدود

طوابير العيش


القبض عل الصحفيين

تحجيم الحريات

قانون الطوارئ

مهانة الشعب المصري امام العالم

اختفاء الطبقة المتوسطة من المجتمع

زيادة النهب والفساد


الضحك على الشعب عينى عينك

ازمة السكن

الحديد

مهو بتاع امه

الاسمنت

ابنى بيتك


زيادة سلطة الشرطة

خروج جامعات مصر من افضل 500 جامعة على مستوى العالم

اضرابات العمال
اضرابات الاطباء
اضرابات الصيادلة
اضرابات المحامين

اضرابات المعلمين

انفلونزا الخنازير

الحمد لله انا كده عملت اللى عليا
شاهدين يا ناااااس
امين يا ريس

ومازال العطاء مستمرا

عن طريق الخطأ

عن طريق الخطأ


الخبر يقول : مقتل مجند شرطة اليوم الاثنين، أثناء وجوده فى محل خدمته، إثر انطلاق رصاصة بطريق الخطأ من سلاح زميله بموقع الخدمة على الحدود جنوبي رفح

كام جندى مات على الحدود عن طريق الخطأ ... كل مرة عن طريق الخطأ مهو فى حاجة من الاتنين
يا اما العساكر عندنا هبل ومش عارفين يستخدموا السلاح بتاعهم سواء فى تنظيفه او تأمينه
وده احتمال

الاحتمال التاني بقى ان العساكر بتوعنا بيلعبوا مع بعض عسكر وحراميه والعساكر اللى ماتت
( عن طريق الخطأ يا عينى ) كانوا من فريق
الحرامية
يعنى انا عاوز افهم كل مرة عن طريق الخطأ .. مفيش طريق تانى
هو ايه يا جدعان عساكرنا بينشنوا على بعض

كفاية بقى اسباب فارغة واخبار مفبركة .. متقولوا ان الجنود الاسرائيلين على الحدود بيصطادلهم
كل اسبوع واحد ولا اتنين

دا غير الاهالى .. لسه من شهر او يزيد قليلا قرينا عن البنت الصغيرة اللى اتقتلت برصاصة جنود اسرائيلين على الحدود فى رفح المصرية
ومفيش حد اتحرك .. وغيرها كتير ومحدش بيكلم
كفاية بقي .. هو خلاص مبقاش فى حتى حد ادنى من الكرامة
كرامة شعب , كرامة جيش , كرامة جندى كل ذنبه انه بيحمى الحدود


********

الحلوة اسمها قصر اعترضوا بقي على مرور مصر

(الصورة الوحيدة المنشورة لهذا الاختراع على الانترنت)

ز ر ع - ق ت ل - ش ن أ

حبيبي القارئ .. ليس هذا درسا من دروس محو الامية
وليس برنامجا تعليميا موجها لأطفال دون الخمس سنوات
انه ( حبيبي القارئ ) النظام المرورى الجديد ... فلا داعى للاستغراب

لقد بدأت هذه الظاهرة فى الانتشار .. ومع كل ترخيص جديد نجد لوحة جديدة بكلمة جديدة
وقد يصل بك الحال الى كره سيارتك اذا اوقعك حظك العاثر فى لوحة لها معنى سئ معلقة على سيارتك
كأن تجد لوحات سيارتك مثلا
( ع ب ي ط - 94 ) او مثلا ( ع ل ج - 112) مع كامل احترامى للذين اوقعهم حظهم
فى مثل هذه اللوحات ..

نيجى بقى لمؤخذة لسواقين التاكسي من اصحاب اللوحات فمثلا انا شفت سواق تاكسي كاتب على عربيته
الحلوة اسمها قصر اعترضوا بقي على مرور مصر
لان عربيته مكتوب على لوحها
ق ص ر - 425

نيجى لمشهد من عسكرى المرور وهو واقف فى الشوارع

العسكرى : ممنوع الوقوف هنا يا ( ن ع أ ) لو سمحت اتحرك
سواق العربية : ايه ( ن ع أ ) ده يا دفعة
العسكري : ده لوحك يا افندى يا محترم هتتحرك ولا اكتبها
السواق اصله مش فى دماغه رقم عربيته الجديد لسه محفظهوش

انا بشوف ساعات عساكر مرور مش عارفين ياخدو المخالفة
انا واقف فى اشارة مرة وعربية عدت من جنبي والعسكرى شايفها بتكسر الاشارة وتعدى رفع ايده بدفتر المخالفات
وقال يا .. يا .. يا ... حسبي الله ونعم الوكيل
فبقوله يا معلم هو ايه انت بقيت بتدعى على اللى بيكسروا الاشارة بدل ما تاخد نمرهم
قاللى لا يا باشا بس ده مركب نمر جديدة
قلتله يعنى ايه هو اللى مركب نمر جديدة بتدعوا عليه بس من غير مخالفة
قاللى يا باشا مبعرفش اقرا غير الارقام ..

يعنى العسكرى حاسس بقلة الحيلة فبيدعى على سواق العربية اللى كسر الاشارة
لاهو فاهم الازرق من الاحمر من الاخضر ولا ملاكى قاهرة من جيزة من كفر الشيخ



اقف يا ح م ا ر ... رخصك يا ب ر ن س

وسمعنى سلام اشارة المرور بتقولنا انتباه

*******

يا أبو تريكة يا مجرم

انه فى يوم السبت الموافق السادس والعشرين من يناير لعام 2008
قام المجرم المصري محمد محمد محمد ابو تريكة بركوب طائرته
وقطع شبكة السودانيين

وفى الوقت اللى كل الناس بيحتفلوا بالهدف ابو تريكة مكنش ناسي قضية وطنه العربي
غزة اللى اصبحت فى طريقها للفناء .. اعتبروا ان اللى عمله ابو تريكة خارج عن القوانين والاعراف الكروية
هى الكورة دى مش رسالة بتتوجه للشعوب برده ولا ايه
لما بتطلع شعارات اللعب النظيف .. والعب من اجل المتعة .. والكلام المزوق ده يبقي حاجة حلوة
ولما يكون فيه رسالة بجد العالم محتاج يعرفها ويركز عليها
يقولوا ممنوع الشعارات السياسية
لما لاعب غانا رفع علم اسرائيل فى كاس العالم محدش قال حاجة يعنى
ولا هى بتيجى عند قضايا العرب وتقف ..

حد يفهمنى ايه الضرر اللى عمله ابو تريكه لاى حد باللى عمله ده .. بالعكس ده موقف فى منتهى
الرجولة من مواطن عربي مهتم بقضايا وطنه مش لعيب من اياهم يبوس السلسلة

يا مجرم يا بو تريكة

******

زفاف ، عزاء ، سبوع وطهور كمان

لم يكن التدوين يوما من الايام بالنسبة لى على الاقل مجرد اداة للتهنئة
بالعيد او بدخول سنة جديدة ميلادية او هجرية .. او التهنئة بيوم عاشوراء
واتكلم عن نفسي ولكم حرية الموافقة او الرفض .. صحيح اننى قمت بالتهنئة فى الاعياد
وفى بداية السنة السابقة 2007 ولكن ليس معنى ذلك اننى قد دخلت عالم التدوين لمجرد التهانئ
وتلقى المباركات .. والا فسأكتب على مدونتى دار مناسبات نقبل الافراح واعياد الميلاد
والعزاء والسبوع .. والخ الخ الخ ..

انا شايف شاب زى العسل ورا اهو بيقولى طب ويا استاذ اسلام واحنا مالنا تكتب ولا تهنى الناس
ولا عنك ما كتبت التهانى دى حاجة ترجعلك يعنى .. اقوله متشكرين يا بن الناس الكويسين
بس انا بقول كده عشان لقيت كام ايميل بيقولولى انى بقيت مهمل فى التدوين وخلاص مبقاش عندى حاجة جديدة
ولا حتى افتكرت انى اقول كل سنة وانوا طيبين فى السنة الميلادية او الهجرية

طب ليه بس الاحباط ده يا جدعان ..
انا قلتلكم على قصدى من التدوين .. تعبير عن افكار بتاعتى وبس
يعنى لمؤاخذة مش مستنى حد يقولى اكتب ايه ومتكتبش ايه ..
واللى عاوز كده يروح ما يطلبه المستمعون .. اسغفر الله العظيم يا رب

اما بعد ... بعد ما 2008 هلت علينا .. و1429 جت ببركتها
واغتيال بنظير مبوتو .. وسباق الانتخابات الامريكية
وانتظارنا للمعجزة اللى هتكسبنا كأس الامم الافريقية
وبعد ما ساركوزى بلبط فى شرم هو والمزة
والاهلى طلع من الكاس من دور ال32
وانفلونزا الطيور ورجعت اشرس من الاول
والاسعار بقت نار زى ما الحكومة وعدت بضبط الاسعار بالظبط

دا انا سمعت ان العيش مش هيتباع رغيف رغيف بعد كده
بعد حجم الرغيف الجديد انه هيبقي شرايط الشريط فى عشرين رغيف

وهو ده التطور الطبيعى لرغيف العيش المصري .. وعلى شرط الشريط ده هيبقي بعشرين جنيه بس
عشان محدودى الدخل ..

مش بقولوكوا متخافوش دحنا داخلين على ايام زى العسل ...
المهم بس اننا نستحمل كده شوة صغننين اد 20 ولا 30 سنة كمان ايه اللى هيحصل
يعنى وهتشوفوا مصر دى احد النمور الافريقية ( تصريح للسيد نظيف ) ايه رأيكم بقي

وبالمناسبة .. حسن شحاتة بعت تهديد لاتوفيستر مدرب الكاميرون
على طريقة السقا فى الجزيرة ..
حسن شحاتة قاله : حدانا فى البلد لما العيال بيلعبوا مصر والكاميرون .. الكاميرون هو اللى بيستخبا

تمنياتى للمنتخب بالتوفيق ان شاء الله

وكل سنة وانتوا طيبين ... :]

******

واهو مولد وانفض !!

كل سنة وكل الشعب المفترى بخير وصحة وفتة ولحمة
صحيح احنا شعب مفترى .. يعنى الحكومة بتواجه الغلا بحسم فظيع
واحنا لسه بنشتكى .. ونقول الدنيا نار .. كدابين فى اصل وشكوا ده الجو حتى برد مووت
يا عالم يا ظلمة ..

وعمو نظيف بيه باشا بعد ما حضر العفريت وسألو على مشكلة
طوابير العيش العفريت قاله مقدرش .. طلع عفريت مبيعرفش
يعنى الراجل هيعمل ايه تانى يا شعب ولاد مفترية .. ده حتى العفاريت حضرها

ده حتى جيمى (طويل العمر يطول عمره ينصره على مين يعاديه) هيعمل بإيده مخابز جديدة وسلع ولحمة
وياقوت ومرجان ورز بلبن .. اه يا شعب ظالم .. قال الدنيا غلا قال .. اومال الرخاء ده مين اللى عايش فيه يا
غوغائيين يا همج .. ده حتى الاسعار منافسه ..

انا مش هكلم بقي عشان مغلطش فى الشعب ابن 60 فى 70 ده .. يا ولاد المفترية دول كانوا بيدرسوا
انهم يصرفوا المعاشات والمرتبات قبل العيد .. صرفوها بقى ولا لأ مش مشكلتى .. المهم
انهم درسوا .. والمثل بيقول اطلبوا العلم ولو فى الصين .. فكويس اوى انهم درسوا يعنى اهو بيتعلموا
يا جهلة يا مفتريين ..

بسسسسسسسسسسس .. اهو جابوا من الاخر وادى مجلس الشعب بتاع الشعب وام الشعب
(بيناااااقش ) اتهام الحكومة برفع الاسعار ... يا صلاة النبي يا صلاة النبي
دى حاجة حلوة خالص .. ربنا يخلي لنا الحكومة
والحزب الوطنى التيموكراتى .. وعمو نظيف وجيمى وانا وانت وررقصنى يا معلم فى احلى عيد اضحى
يا شعب مفتر ابن ... تييييييييييييييييييييييت


واهو مولد وانفض .. وغيره جااااى ..

******

يحيا الرئيس الى الابد

ايه الحلاوة دى .. قال تعبان قال .. مهو زى الفل اهو

شوفوا انا سكت قد ايه على الموضوع ده .. مع انى مش من عادتى اسكت فى الحاجات دى
قال ايه كانوا بيقولوا الريس تعبان وفى حالة محرجة .. حلوة محرجة دى بدل حرجة واهو كله تجديد .. وقال ايه كمان
الريس هبااااااا طلع السيكريت الالهى .. لا لا لا .. دى مش اخلاق شعبنا ابداااااا
اكيد دى كانت مدسوسة علينا الحكاية دى ..

انا كنت ساكت عشان مكنتش قادر اعلق على موضوع مؤثر بالشكل ده
موضوع اثر على نفسوية الشعب كله وخلاه زعلان ومضايق وشايل الهم
وانا شرحه .. هو انا مش من الشعب ولا ايه

بقي الراجل يروح يصيف يومين تطلع الاشاعات دى كلها
يضطر يرجع سريعا سريعا ويعمل جولة فى القرية الذكية
يعنى يجى من الساحل على الارياف
.. لا يا برنس القرية الذكية دى فى شرم الشيخ على فكرة

ما علينا ما علينا .. اهو راح القرية وقال يمكن شوية الغوغائيين دول يتهدوا
ورجع على البحر ..

شوية والراجل يسمع انه انتقل الى الجحيـــ.... احم احم
انتقل الى الجنة .. قال لا بقي انا نازلهم ولاد الـــــ..... معلش يا ريس الكلام ده ممنوع هنا

مش عيب .. مش عيب تفولوا على الريس كده وهو حى يرزق .. بصراحة عيب
لا صحيح عيب جدا ..

وانا تضامنا مع السيد الرئيس دلوقتى حالا
انا عاوز اعرف مين السافل ابن السافل اللى فقع البمبة
.. احم احم قصدى الاشاعة

محدش عاوز يرد .. ماشي انا غيظا ونكاية فى مروج تلك الشائعة المغرضة
بحب اشكر الشاعر الحليوة عبد الرحمن يوسف على القصيدة الحلوة دى
ريحتلى اعصابي وطمنتنى على مصر مبارك ..



وسمعنى سلام انتى اللى طلبتى تطلقي ..

******