زفاف ، عزاء ، سبوع وطهور كمان

لم يكن التدوين يوما من الايام بالنسبة لى على الاقل مجرد اداة للتهنئة
بالعيد او بدخول سنة جديدة ميلادية او هجرية .. او التهنئة بيوم عاشوراء
واتكلم عن نفسي ولكم حرية الموافقة او الرفض .. صحيح اننى قمت بالتهنئة فى الاعياد
وفى بداية السنة السابقة 2007 ولكن ليس معنى ذلك اننى قد دخلت عالم التدوين لمجرد التهانئ
وتلقى المباركات .. والا فسأكتب على مدونتى دار مناسبات نقبل الافراح واعياد الميلاد
والعزاء والسبوع .. والخ الخ الخ ..

انا شايف شاب زى العسل ورا اهو بيقولى طب ويا استاذ اسلام واحنا مالنا تكتب ولا تهنى الناس
ولا عنك ما كتبت التهانى دى حاجة ترجعلك يعنى .. اقوله متشكرين يا بن الناس الكويسين
بس انا بقول كده عشان لقيت كام ايميل بيقولولى انى بقيت مهمل فى التدوين وخلاص مبقاش عندى حاجة جديدة
ولا حتى افتكرت انى اقول كل سنة وانوا طيبين فى السنة الميلادية او الهجرية

طب ليه بس الاحباط ده يا جدعان ..
انا قلتلكم على قصدى من التدوين .. تعبير عن افكار بتاعتى وبس
يعنى لمؤاخذة مش مستنى حد يقولى اكتب ايه ومتكتبش ايه ..
واللى عاوز كده يروح ما يطلبه المستمعون .. اسغفر الله العظيم يا رب

اما بعد ... بعد ما 2008 هلت علينا .. و1429 جت ببركتها
واغتيال بنظير مبوتو .. وسباق الانتخابات الامريكية
وانتظارنا للمعجزة اللى هتكسبنا كأس الامم الافريقية
وبعد ما ساركوزى بلبط فى شرم هو والمزة
والاهلى طلع من الكاس من دور ال32
وانفلونزا الطيور ورجعت اشرس من الاول
والاسعار بقت نار زى ما الحكومة وعدت بضبط الاسعار بالظبط

دا انا سمعت ان العيش مش هيتباع رغيف رغيف بعد كده
بعد حجم الرغيف الجديد انه هيبقي شرايط الشريط فى عشرين رغيف

وهو ده التطور الطبيعى لرغيف العيش المصري .. وعلى شرط الشريط ده هيبقي بعشرين جنيه بس
عشان محدودى الدخل ..

مش بقولوكوا متخافوش دحنا داخلين على ايام زى العسل ...
المهم بس اننا نستحمل كده شوة صغننين اد 20 ولا 30 سنة كمان ايه اللى هيحصل
يعنى وهتشوفوا مصر دى احد النمور الافريقية ( تصريح للسيد نظيف ) ايه رأيكم بقي

وبالمناسبة .. حسن شحاتة بعت تهديد لاتوفيستر مدرب الكاميرون
على طريقة السقا فى الجزيرة ..
حسن شحاتة قاله : حدانا فى البلد لما العيال بيلعبوا مصر والكاميرون .. الكاميرون هو اللى بيستخبا

تمنياتى للمنتخب بالتوفيق ان شاء الله

وكل سنة وانتوا طيبين ... :]

******